Son áigu ságastallat nuorra artisttaiguin sin musihka ja kulturduogáža birra ja nu loktet oidnosii miehtá máilmmi eamiálbmogiid nuorra taleanttaid.
DJ iDJa, gii aiddobáliid lea fárren Berlinii, almmuhii dán vahkku podcasta «Suolgga».
Sámi artista ii leat gal láikkohallan dan rájes go fárrii Berlinii. Son lea aiddo ožžon dohkkehuvvot iežas ohcamuša beassat sáddet prográmma Berlina rádios, Etikett Radio. Vuosttaš prográmma sáddejuvvui dán vahkku, dasto almmuhuvvo ođđa prográmma juohke gaskavahkku boahtte dálvvi.
– Lea diibmosaš njuolggosátta gaskavahkkuid mii maid almmuhuvvo podcastan čuovvovaš sotnabeaivvi, muitala «DJ iDJa», dahje Markus Johnsen Thonhaugen, gii guoddá dán artistanama.
Prográmma namma lea «Suolgga». Artista čilge preassadieđáhusas ahte dat lea boares sámegiel sátni man son lea áhčistis oahppan.
– Sátni mearkkaša ahte galgá gulul váldit. Mu mielas lea dat vuogas namma, go jurdda lea juste ásahit báikki gos váldit bottu árgabeaihušas ja ovttas guldalit ja oahppat eamiálbmogiid musihkas, čilge prográmmajođiheaddji.
Ođđa guossi juohke vahkku
Juohke prográmmii bovde son nuorra eamiálbmotartistta muitalit iežas musihka, duogáža ja kultuvrra birra.
– Vuosttaš prográmmas lei DJ Ailo gudneguossin. Son muitala rahpasit mo lea váldit ruovttoluotta sámegiela go skuvllas ii oahppan dan ja mo musihkka lea dehálaš reaidu loktet sámegiela ja sámi kultuvrra. Lea fiinna jearahallan, mas oahpásmuvvat olbmuin musihka duogábealde. Juste dan birra galget ge dát prográmmat, muitala DJ iDJa.
Prográmma sáddejuvvo njuolggosáddagis suolgga.com siiddus gaskavahkkuid.
