– Ráđđehus leat duođas váldán parkerensuorggi hástalusaid. Diibmá mearridedje ođđa parkerennjuolggadusaid. Jahkemolsumis doaibmagohte ođđa njuolggadusat, lohká johtolatministtar Ketil Solvik-Olsen.
Ođđa njuolggadusat dohkkehuvvojedje stáhtaráđis diibmá, njukčamánus. Dat guoskkaha eanas beliid parkerendoaimmain. Dan dieđiha johtalusdepartemeantta preassadieđáhusas.
– Leat 2005 rájes bargan ođđa parkerennjuolggadusaiguin. Lea leamaš unnán politihkalaš áŋgiruššan. Dál lean hui olus go ráđđehus lea guldalan sihke geavaheddjiid ja parkerensuorggi. Ođđa njuolggadusat leat álkibut parkerensuorgái, ja buoret kundariidda, lohká Solvik-Olsen.
Vihtta minuhta maŋŋil
Dál ii sáhte sáhkkuhit ovdal vihtta minuhta leat gollán dan rájes go bileahttaáigi nogai. Dat mearkkaša ahte jus boahtá moadde minuhta maŋŋit, de ii oaččo sáhku dan dihte.
Son guhte parkere galgá maid oažžut áiggi lohkat njuolggadusaid ja máksit parkerenbileahta, ovdal go sáhttá sáhkkohallat.
Álkit váidit, ja ođđa parkerenváiddalávdegoddi
Buot kundariin lea dál vejolašvuohta váidit jus leat sáhkkohallan. Álggos ferte váidit fitnodahkii. Jus fitnodat doalaha mearrádusa, dahje eai meannut váidaga áigemearis, de sáhttá váidit Parkerenváiddalávdegoddái.
Parkerenlávdegoddi lea ovdal maid leamaš, muhto dalle lei eaktodáhtolaš, ja šiehtadusaid mielde. Dál lea bággu, ja lágas mearriduvvon. Buohkat geat doaimmahit parkerendoaimma, leat lávdegotti vuolde, ja šaddet doahttalit sin.
Golbma fásta máksinmeari
Dál leat golbma máksinmeari. Vuolimus máksimearri lea 300 ruvnno.
Dat guoská daidda geahppaseamos rihkkumiidda. Jus ii leat viežžan nuvttá bileahta, dahje jus son guhte lea guođđán biilla ovtta sadjái, lea mannán eará rámbuvrii go dasa masa parkerensadji gullá.
Dábálaš máksinmearri lea 600 ruvnno. Dat guoská dábálaš rihkkumiidda. Jus ii leat máksán parkerema ovddas, ja jus čuožžu guhkit go man ovddas lea máksán.
Alimus máksinmearri lea 900 ruvnno, ja dat guoská jus parkere dakkár sadjái mii guoská doaimmashehttejuvvon olbmuide.
Parkerensajit el-biillaide ja doaimmashehttejuvvon olbmuide
Ođđa gáibádus lea ahte galget láddensajit el-biillaide. Okta oassi parkerensajiin galget maid várrejuvvon doaimmashehttejuvvon olbmuide.
Buot parkerendoaimmat mearridit ieža fállet go nuvttá parkerema el-biillaide.
Doaimmashehttejuvvon olbmuin geain lea parkerenlohpi, besset nuvttá parkeret suohkaniid parkerensajiin. Priváhta parkerensajiin mearridit ieža lea go nuvttá vai ii.
