Vuosttaš háve Siidda Sámemusea ja Badje-Sámi luondduguovddáža historjjás leat badjel 63 000 olbmo fitnan čájáhusain.
63 935 čájáhus- ja dáhpáhusguossi fitne Siidda Sámemusea ja Badje-Sámi luondduguovddážis 2019:s. Dat lea olahus go lea vuosttaš háve Siidda historjjás go badjel 63 000 olbmo fitne čájáhusain.
– Mii dáppe Siiddas illudit viiddideamis, divodanbargguin ja čájáhusaid ođasmahttimis, mat leat boahtimin. Ná mii sáhttit ain buorebut bálvalit iežamet áššehasaid, mat orrot leamen jagis jahkái eanet ahte eanet, čállá Siidda musea preassadieđáhusas.
Siidda bálvalusaid geavahedje diibmá viššalit. 2019:s ledje oktiibuot 121 000 galledeami, mii lea nubbin eanemus Siidda historjjás. Siidda čájáhus- ja dáhpáhusgallededdjiid lassin lohkui leat rehkenaston Meahciráđđehusa bálvalanbáikki, turismarávvema ja restoráŋŋa Sarrida guossit.
Oallugat čájáhusain
Siidda gallededdjiin badjel bealli, measta 64 000 olbmo, fitne geahččamin čájáhusaid dahje dáhpáhusaid. Dát lea Siidda 21 jagi historjjá stuorámus čájáhusgallededdjiid mearri. Mearri lea lassánan ovddit jagis olles 8 proseantta.
Vuođđočájáhusain, mat muitalit sámekultuvrras ja davviguovllu luonddus, lea ollu diehtu mii geasuha gallededdjiid. Jagi 2019 molsašuvvi čájáhusaid bivnnuhamos čájáhusat ledje «Toovláš já tááláš anarâš kietâtyeji» ja «Nuppástuvvi dálvi».
Dábálaččat geasset
Árbevirolaččat galledit eambbo olbmot Siidda geasset go dálvet. Siidda gallededdjiid meari lassáneapmi oidno eandaliige dálvit. Juovlamánus 2019:s lassánedje galledeaddjit 25 proseantta ovddit jagi ektui. Ođđajagimánus lassánii lohku 16 proseantta ovddit jagi ektui.
Eanas olgoriikalaččat
Siida lea riikkaidgaskasaš deaivvadanbáiki. Siidda galledeaddjit bohte jagi 2019 oktiibuot 87 iešguđet riikkas.
Olgoriikalaččain eanemus ledje duiskalaččat (8,4 proseantta buot gallededdjiin) ja nubbin eanemus fránskalaččat (7,7 %). Duiskalaččat ja fránskalaččat leat leamaš juo guhkit áiggi allin Siidda gallededdjiid statihkkalisttuin. Eará riikkat ledje Kiinná ja Hong Kong (4,7 %), Itália (4,6 %), Amerihkká (4,5 %) ja Hollánda (4 %).
Siidda 2019 gallededdjiin ledje 39 proseantta Suomas ja olgoriikkain 61 proseantta. Olgoriikalaččaid goralaš oassi olles gallededdjiid mearis lea lassánan jagis jahkái. Ovdamearkka dihte jagis 2014 olgoriikka galledeaddjit ledje 55 proseantta. Maiddái ruovtturiikka gallededdjiid mearri Siiddas lea lassánan 4,7 proseantta ovddit jagis.
Turismma ođđa biekkat bosodit maid Siiddas. Joavkomátkkiid sajis leat eanet ovttaskas mátkeplánat. Diibmá Siiddas vuvde eanemus sisabeassanbileahtaid ovttas olgoriikka ollesolbmuide ja nubbin eanemus daidda olgoriikka ollesolbmuide, geat mátkkoštedje joavkku mielde.
Suomas Museakoarta lea bivnnut ja dat lea buktán maid Siidii eanet ja eanet gallededdjiid. Jagi 2019 áigge Siidda gallededje Museakoarttain 2 707 olbmo, lohku lea 38 proseantta stuorát ovddit jagi ektui.
