2014 rájes lea oahpaheddjiid lohku geat ožžot lassi oahpu lassánan golmmageardánit – ja boahtte čavčča ožžot 215 oahpaheaddji fálaldaga lassioahpu váldit.
2025 rádjái ferte olu oahpaheddjiin lassioahppu olu fágain, go boahtá mearri ahte mánáidskuvlaoahpaheddjiin fertejit leat unnimusat 30 oahppočuoggá, ja nuoraidskuvlaoahpaheddjiin unnimusat 60 oahppočuoggá.
– Buorit oahpaheaddjit, geain lea nanu ja áigeguovdilis máhttu, leat dárbbašlaččat jus oahppit galget beassat oahppat eambbo. Lagabui 20 000 oahpaheaddji leat juo váldán lassi oahpu, ja dál ožžot olu ođđa oahpaheaddjit maid vejolašvuođa dasa. Dát áŋgiruššan dahká oahpaheddjiid vel buorebun, lohká oahppo- ja searvádahttinministtar Jan Tore Sanner preassadieđáhusas.
Stuora lassáneapmi diimmá rájes
Diimmá rájes lea Finnmárkkus 5 % lassáneapmi oahpaheddjiin geat váldet lassi oahpu.
- Bearalvági suohkanis lassána guovtti oahpaheaddjis guđa oahpaheaddjái diimmážis dán jahkái (200 %)
- Mátta-Várjjaga suohkanis lassána 13 oahpaheaddjis 24 oahpaheaddjái diimmážis dán jahkái (84 %)
- Davvesiidda suohkanis ja Muosáid suohkanis lassánit golmma oahpaheaddjis viđa oahpaheaddjái diimmážis dán jahkái (67 %)
- Kárášjoga gielddas lassána viđa oahpaheaddjis čieža oahpaheaddjái diimmážis dán jahkái (40 %)
