-Almmuhus-
SMÁVVAOĐĐASATOđđa olahus el-biila­jođus

Ođđa olahus el-biila­jođus

-

-

Dán jagi leat ovccilot proseantta priváhta biilaostiin oastán el-biilla. NAF oaivvilda danne fertet álkidahttit  láddema. 

Go leat nu ollu el-biilavuoddjit luottaid alde, de ferte šaddat álkibun máksit jođánisláddema ovddas, oaivvilda Norges Automobil-Forbund (NAF) searvi. 

– Dán rádjai dán jagis leat Norggas vuovdán 80 000 elbiilla. Dat lea sullii seamma ollu go olles mannan jagis. Measta njeallje biilla juohke viđa ođđa biillas dán jagi, dahje 78 proseantta ođđa biillain, leat leamaš el-biillat. Diibmá lei dat oassi 63 proseantta, dadjá Thor Egil Braadland, NAF eiseváldioktavuohta. 

Braadland oaivvilda ahte alla elbiilajohtu ferte buktit politihkalaš váikkuhusaid, ja čujuha dasa ahte ráđđehus lea lohpidan dán jagi buktit ođđa láddenstrategiija.  

Juohke goalmmát rahčá jođánisláddemiin

NAF lohká dál leat fargga 600 000 elbiilla Norggas, ja go seammás dadjá eanet go juohke goalmmát elbiilavuoddji lea bártidan máksimiin jođánisláddenbáikkiin, de ferte sin mielas juoga dahkkot. 

– Oallugat atnet issorassan máksit go galget láddet, ja danne vurdet eambbosat go livčče dárbu oastimis elbiilla. Dál fertejit leat 10-15 áppa vai galgá sáhttit oastit láddema vaikko gos. Dan sáhtášii álkidahttit, ja mii leat ohcalan rabas, digitála láddema, nu gohčoduvvon  «e-roaming», mainna sáhttá ovttain áppain álggahit, bissehit ja máksit láddema ovddas buot láddenstašuvnnain, dadjá Braadland.

-Almmuhus-