Sámediggeráđđi Mikkel Eskil Mikkelsen (NSR) ja máhttoministtar Tonje Brenna (Ap) ráđđádallaba ođđa oahpahuslága.
Olles oahpahusláhka lea dárkkistuvvomin, dan oktavuođas galgá sámediggeráđđi Mikkel Eskil Mikkelsen (NSR) ja máhttoministtar Tonje Brenna (Ap) ráđđádallat vuossárgga geassemánu 13.beaivvi ođđa oahpahuslága birra.
Stuorra vuordámušat
Ráđđádallan lea oassi stáhtaráđi fitnamis Sámedikkis dievasčoahkkima oktavuođas, mii lea boahtte vahkku.
– Lea suohtas ahte máhttoministtar fitná min luhtte, ja mis leat stuorra vuordámušat ahte stáhtaráđis leat áigumušat nannet sámi oahppanvuoigatvuođaid. Mii fertet sihkkarastit háhkat eanet sámegielat ohppiid ja buriid rámmaeavttuid. Mis ferte maid mihttun láhččit buriid rámmaeavttuid mat fuolahit skuvlla kvalitehta, dadjá Mikkel Eskil Mikkelsen.
Sámediggi ja Máhttodepartemeanta lea ráđđadallanproseassas gos Máhttodepartemeanta lea buktán evttohusa ođđa oahpahusláhkii, mii lea leamaš gulaskuddamis gitta juovlamánu 20.beaivái diibmá 2021.
