Ráiddus «URBI – hás it!» čuovvu NRK njeallje nuorra sámi artistta geat leat iešguđet dásis iežaset karriearas ja geain lea iešguhtetge vuolggasadji ja niehku šaddat artistan.
NRK čuovvu artisttaid Vegard Bjørsmo, Kevin Boine, Natalie Carrion ja Thea Thomassen sin stuora mihttomeari guvlui jagis 2020, ja beassat sin fárus vásihit vuordemeahttun lihkostuvvamiid ja hirpmástuhttimiid, čállá NRK preassadieđus.
Musihkkaniehku
Okta lea easkka álggahan iežas musihkalaš doaimma, ja nubbi ges lea juo gearggus beaggigoahtit Norggas ja muđui Skandinávias. Buohkaid oktasaš niehku lea eallinláibbi háhkat iežas stuora beroštumis. Man olu vara, bivastaga ja gatnjaliid ferte golggahit ovdal go olaha iežas mihttomeriid, ja lea go duođai nu ahte olmmoš nagoda olahit buot maid háliida jus fal bargá doarvái garrasit dan ovdii?
Go koronapandemiija bisseha olles máilmmi, de fertejit sii fáhkka rievdadit buot iežaset plánaid ja šluhttet deaŧalaš konsearttaid ja vásáhusaid maidda ledje guhká illudan. Olahit go sii liikká iežaset mihttomeriid?
Dáid artisttaid čuovvut NRK-ráiddus:
Vegard Bjørsmo (19) lea Kárášjogas eret, muhto orru dál Oslos gos váldá oahpu musihkkateáhterallaskuvllas. Son háliidivččii šaddat vuosttaš sámi musihkkaartistan gii ráhkada musikálaid sámegillii. Vegard nevttii Kristoffa jiena Frozen II filmma sámegiel almmuheamis Jikŋon II, muhto eatnasat dáidet su dovdat dán jagá «Stjernekamp» gilvvus.
Natalie Carrion (23) orru Ubmis Ruoŧa bealde. Su stuorámus niehku lea olahit riikkaidgaskasaš beaggima iežas musihkain, ja vuosttaš lávki lea beassat searvat Ruoŧa Musikkfestivalenii. Natalies leat ruoŧelaš, sámi ja karibia ruohttasat – ja dán háliida son čájehit iežas ráhkadan musihkas.
Kevin Boine (27) lea Deanus eret, ja orru Hámmárfeasttas. Sus lea soahpamuš Universal Norgiin, ja su lávlagat leat streamejuvvon birrasiid 60 miljovnna geardde, main «Drømmeland» lea birrasiid 20 miljovnna geardde čuojahuvvon. Son searvvai Norgga Melodi Grand Prixii 2020 lávlagiin «Stem på mæ», muhto vuoittáhalai oassefinálas.
Thea Thomassen (23) lea Álttás eret ja orru Londonis gos studere musihka ja lea easkka álggahan joavkku. Su stuorámus niehku lea čuojahit olu olbmuide Tokyo Dome lávddis.
