Finnmárkkuopmodaga lea ođđa kártaportálii čoaggán buot rabas bartasajiid.
– Digitála kárta galgá geahpidit bartaniegu ollašuhttima ja addit čorgadis gova vejolašvuođain bartasaji fidnet, lohká Finnmárkkuopmodaga (FeFo) eatnamiid ja vuoigatvuođaid ossodaga jođiheaddji, Sverre Pavel.
Dál leat 120 rabas bartasaji kártaportálas. Go kárttas deaddilat dihto bartasaji, de ihtet dasa gullevaš dieđut oktan ohcanskoviin.
– Jus olbmot dáhttot eará báikkiide bartasaji, de ávžžuhan cealkámuša buktit guoskevaš suohkanii go suohkanplána ođastuvvo, lohká Pavel. FeFo bargá dađistaga ovddidit ođđa ja njuovžilis čovdosiid. Ovdalaččas fállet seammalágan čovdosa luossasajiid ja muorračuollansárgáid ohcamiidda.
