Norgga ráđđehus lea ásahan ođđa doaibmabijuid eastadan dihte nuppástuvvan koronavariántta leavvamis.
Dearvvašvuođaeiseválddit leat sihkkarat ahte omikron-variánta maiddái boahtá Norgii, goas dal de. Danne bidjá Norgga ráđđehus ođđa doaibmabijuid ráhkkanan dihte dasa.
Isolašudvna ja erren čavgejuvvo
Dál guhkiduvvo isolašuvdna-áigi viđa beaivvis čieža beaivái sidjiide geaidda omikron-variánta sáhttá njommon. Olbmot seamma ruovttus ja eará lagasoktavuođat fertejit leat erremis logi beaivvi. Maŋemus áiggiid ii leat leamaš errengáibádus sidjiide geat leat ollásii boahkuhuvvon ii ge sidjiide geain lea leamaš korona maŋemis jagis.
Šaddá maid bággu iskkahit maiddái lagasoktavuođaid, ja galget guokte PCR- iskosa, vuosttaš nu jođánit go vejolaš ja nubbi gaskal golbma ja čieža beaivvi maŋŋel. Lagasoktavuohta galgá maid garvit mannamis eará olbmuid lahka vuosttaš negatiiva bohtosa rádjái.
Gusket buohkaide
Buot doaibmabijut gusket buohkaide, vaikko makkár boahkuhanstáhtus livččii. Dat doaibmabijut eai šat leat gáibádussan jus čájehuvvo ahte ii leat omikron virusvariánta.
– Lea hui jáhkehahtti ahte ođđa koronamuhttašupmi omikron njoammu olu álkibut go eará variánttat. Vásáhusat duođaštit ahte virus. mii álkit njoammu, boahtá buot riikkaide, maiddái Norgii, dadjá dearvvašvuođaministtar Ingvild Kjerkol (Bb) preassasdieđáhusas.
Bearjadaga dat bođii albmosii ahte ođđa virusvariánta lea jođánit njommon Lulli-Afrihkás, ja lea leavvan olu Eurohpá riikkaide.
Stáhtaministtar Jonas Gahr Støre (Bb) čilge distaga Stuoradiggái movt ráđđehus pláne dustet koronadili ja omikron-variántta.
