2128 olbmo leat gaskavahkku ožžon duođaštuvvon covid-19 dávdda Ruoŧas. Dat lea dat alimus lohku Ruoŧas dan rájes go pandemiija álggii.
Oktiibuot leat 117 913 olbmo ožžon duođaštuvvot korona Ruoŧas dál. Maŋemus jándora leat ovccis jápmán koronadávddain. Oktiibuot leat 5927 olbmo jápmán koronadávddain dan rájes go pandemiija álggii Ruoŧas.
Dearvvašvuođaeiseváldi lea cealkán ahte Ruoŧŧa lea dál nuppi njoammunbárus.
Máŋgga báikkis leat báikkálaš njuolggadusat biddjon johtui, ja statistihkka čájeha ahte njoammun lassána 17 guovllus Ruoŧa 21 guovllus, čállá Expressen.
Go dál lassána nu olu, de sáhttá leat dan sivas go leat ollugat geat váldet iskosa dál, muhto lea maid nu ahte duohta njoammun lea maid lassáneame.
Ruoŧa eiseválddit dieđihit ahte 56 olbmo leat koronadávdda dihte intensiivadivššus buohcceviesus dál. (©NTB)
