Sii árvvoštalle bissehit gávpečorraga vuovdimis njuovahahkii, muhto leat ožžon lohpádusa ahte ožžot buoret hattiid.
Sii árvvoštalle bissehit gávpečorraga vuovdimis njuovahahkii, muhto leat ožžon lohpádusa ahte ožžot buoret hattiid.
*/
Máhkarávjju orohat leat mannan vahkkus vuovdan gávpečorragiid moatti bihttás Finnmark Reinii, ja go ožžo dan vuosttaš čorraga ovddas klassifiserenreivve de ledje eahpádusas vuvdetgo šat dohko. Máhkarávjju boazodoalli Leif Anders Somby muitala sii vuvde álggos 300 heakka, muhto go oidne ahte buorit bohccot manne klássii mii attii 50 ruvnno kilos.
– Min mielas ii lean dat dohkálaš ahte buriid bohccuiguin nie heitot haddi ja dieđiheimmet Finnmark Reinii ahte eat buvtte šat eambbo bohccui jus die lea haddi.
Gulahalle
Sii goitge gulahalle nu ahte Finnmark Reinan ožžo čálalaš lohpádusa ahte ođđa klassifiseren ii galgga hehttehussan oaččut buore hatti.
– Mii oaččuimet dáhkiduvvot ahte galgat buoremus hatti oaččut buoremus bohccuin, lohká Somby.
Okta njuovahat
Somby lohká dán áššis leat moadde beali. Dat leat ođđa klassifiseren vuogádat mii galggai addet buoret hatti, ja dat go Supmii vuovdit ii šat luvve buvttadandoarjaga.
– Dál mis ii leat praktihkalaččat go okta njuovahat gosa sáhttet vuovdit, ja buoremus livčče jus Norggas loktanivčče biergohaddi seamma dássái go suomas.
Ii loahpasátni daddjon
Sombys leat ipmárdus ahte go juoga ođas álggahuvvo, nu movt dál dat klassifiseren de sáhttet álgováttisvuođat.
– Dieđusge livčče buoremus jus njuovahagas livčče buot gárvvis go buktá gávpebohccuid sidjiide, muhto dat bárti sáhttá dagahit ahte Finnmark Rein rievdada ja buorida klassifiserema. Loahppasátni ii leat vel daddjon, ja sáhttá nu šaddat ahte dat unnimus ja jorbadeamos miesit klassifiserejuvvot dan EUROP mielde, ja dat stuorimus ja buoiddimus miesit ges kilo mielde. Dat dieđusge livčče buoremus boazoeaiggádii.
Rievdadit klassifiserema
Finnmark Rein beaivválaš jođiheaddji Are Figved lohká sii leat oahppame eambbo dan ođđa EUROP klassifiserenvuogi.
– Máhkarávju lei okta dain vuosttažiin geat bukte gávpečorraga midjiide, ja imaštalaimet veaháš ahte go ledje njeallje 25 kilosaš miesi mat manne njealji iešguđet klássii. Danne iskagođiimet dan EUROP vuogádaga ja gávnnaimet mii fertet smávvašibit klassifiserema atnet vuođđun go bohccuid klassifiseret.
Lohpidit buorii hatti
Figved duođašta sii leat lohpidan Máhkarávjui ja buot boazoeaiggádiidda ahte miesit mat leat badjel 20 kilo, galget mannat daid buoremus klássaide.
– EUROP vuogádagas lea vejolaš kombineret Kiloid ja klássaid, ja dan áigut ovddasguvlui dáhkát. Miesit mat leat unnit, muhto deahkkat mannet alit klássii go miesit mat eai leat deahkkat. Figved namuha orohagaid main leat stuorat bohccot, leat guhkit áigge čorgen ealuineaset ja vuovdán eret njiŋŋelasaid mat eai guotte stuora misiid.
– Das geas leat bohccot main lea lossa deaddu, ja seammás leat deahkkat oažžu dan buoremus hatti, ja mus lea jáhkku ahte buohkain lea vejolaš rádjat ealuid ja nu buvttadit buoremus lági mielde, lohká son.
