-Almmuhus-
KULTUVRAOđđa julevsámegiel mánáidgirji

Ođđa julevsámegiel mánáidgirji

-

-

Ođđa julevsámegiel mánáidgirji, »Ruoppsisgállo», almmuhuvvui golggotmánu 3. beaivvi. Girječálli Samuel Gælok lohká muitalus lea eallán máŋgalogi jagi ovdal go šattai girjin.

Divttasvuona girječálli Samuel Gælok lea gárven ođđa julevsámegiel mánáidgirji, «Ruoppsisgállo». Dat lea muitalus Biehtára birra, gii vuolgá galledit iežaset fulkkiid. Biehtár ferte vázzit badjel vári ollet fulkkiidd lusa. Dat lea guhkes mátki ja son ferte idjadit dan gaskkas. Son páhkke seahka ja bidjala mátkái. De son muitá maid Ánndi-áddjá lea dadjan: «Ale idjat Ruoppsisgállos, dat šaddá dušše giksin dutnje.» Lea guhkki vázzit, ja mátkkis son vásiha imašlaš dáhpáhusa. 

Ruoppsisgállo

«Ruoppsisgállo» lea nana muitalus mas lea njálmmálaš stiila. Girji lea heivehuvvon mánáide ja maiddái stuorra mánáide. Samuel Gælok almmuhii vuosttaš mánáidgirji 1992:s, «Subttsasa nuoramusájda». Son lea dan rájes almmuhan máŋga mánáidgirjji ja son lea maiddái jorgalan girjjiid julevsámegillii. Dán háve son almmuha girjji «Ruoppsisgállo». Girječállii Samuel Gælok muitala ahte dat muitalus lea eallán nu guhká ovdal go su mánát ohppe beahkit ja son lea dál ilus go muitalus viimmat lea boahtán girjehápmái.

– Mun lean «Ruoppsisgállo» muitalusa muitalan iežan mánáide áigá juo, máŋgalogi jagi dás ovdal. Mus leat golbma máná ja sii besse dan gullat ovdal go sii ohppe beahkit. De mearridin čállit dan girjin, muhto dat ii šatta justa seamma, go dat lea eanet dakkár njálmmálaš muitalus ja lea hui árbevirolaš sámi muitalus, lohká mánáidgirječálli Samuel Gælok.

Govvasárgumat

Girjji sárgumiid lea Sissel Horndal sárgon, ja  son lea ge ožžon bálkkašumi iežas govvasárgumiid ovddas. Son lea grafihkalaš designer ja girječálli. Girječálli Gælok lea ilus go Horndal lea leamaš mielde sárgume govaid girjái.

– Sissel Horndal lea hui čeahppi sárgut govaid ja lei dehálaš oažžut govaid mielde girjái. Dat govvidit mimihka ja lea maiddái muitalusa ollistan sárgumiiguin. Jáhkán muitalus rievddai veahá maŋŋá go oaččui illustrašuvnnaid, go dán muitalusa lean dušše mun muitalan ovdal njálmmálaččat, lohká Gælok. 

Doaivva ahte liikojit

DOAIVVA: Mánáidgirječállis Samuel Gælokas lea doaivva ahte mánát liikojit «Ruoppsisgállo» muitalusa. Vuorkágovva.
DOAIVVA: Mánáidgirječállis Samuel Gælokas lea doaivva ahte mánát liikojit «Ruoppsisgállo» muitalusa. Vuorkágovva.

Son muitala leamaš guhkes proseassa dan rájes go son muitalii dán muitalusa Iđut-lágádussii ja dassái go girji oaččui ruhtadeami Sámedikkis.

– Dat proseassa lea ádjánan guokte jagi, manai guhkes áigi bargat girjjiin dassái go gárvánii. Mun doaivvun ahte mánát liikojit girjái, loahpaha mánáidgirječálli Samuel Gælok.

-Almmuhus-