– Mii sáhttit hervet kultuvrra fiinna sániiguin, muhto deháleamos lea ahte ásahuvvo buorre ja doaibmi kultuvra.
– Mii sáhttit hervet kultuvrra fiinna sániiguin, muhto deháleamos lea ahte ásahuvvo buorre ja doaibmi kultuvra.
Su váibmu julká garrasit Finnmárkku ovddas ja seamma ládje julká kultuvrra ovddas. Brynjar Strand Rasmussen lea virgáduvvon Lávdi Finnmárkku ođđa jođiheaddjin.
Son lea máŋggaid jagiid čuvvon Davvi-Norgga kultureallima ja lea maid musihkkárin ja buvttadeaddjin bargan ealáskahttit giliid ja gávpogiid kultureallima, čállá Finnmárkku fylkkagielda preassadieđáhusas.
– Mus lea stuora beroštupmi min báikkálaš servvodagaide ja makkár árvu dain lea min riikaoassái ja min riikii, gos kultuvrras lea stuora ja dehálaš rolla, lohká ođđa jođiheaddji.
– Dehálaš ovddidit earenoamášvuođa
Brynjar Strand Rasmussen lea 41 jagi boaris ja lea Nordfjordeidas eret, muhto ássá Gilevuonas dál.
– Lean ožžon vuđolaš máhtu min guovlluid birra go lean orron davvin, ja lean daid osiid váldán mielde iežan bargui našunála stivrii ja lávdegottiide nu go Norsk Jazzforum ja Fond for utøvende kunstnere. Min guovllu earenoamáš ja šearradeamos osiid ovddidit lea hui dehálaš munnje, muitala Strand Rasmussen.
Ámmátmusihkkár ja buvttadeaddji
Son boahtá buvttadeaddjevirggis dál, Nordnorsk Jazzsenter musihkkaguovddážis, ja lea prošeaktajođiheaddji ja dáiddalaš jođiheaddji doaimmaid maid Nordnorsk Jazzsenter ja Rytmisk Kompetansenettverk i Nord (RYK) leat čađahan.
Berošta nuorain
Fylkkasuohkana ođđa bargi háliida ođđa olbmuid rekrutteret, ja lohká earenoamáš dehálažžan movttiidahttit nuorra kulturbargiid ja jáhkkit sidjiide.
Son lei mentor ja kursalágideaddji nuorra buvttadeaddjitaleanttaide «Nuorra buvttadeaddjit» prošeavttas, mii lea ovttasbargu viđa guovllu jazzguovddážiid ja Moldejazz gaskkas.
– Dehálaš Finnmárkui
– Lávdi Finnmárku lea dávvir man ferte čábbát dikšut. Musihkkárat, geain lea alla gelbbolašvuohta, buorre hálddahus ja ollu vuogas lávddit nu go skuvllat, girkut, servvodatviesut, lávddit ja eará earenoamáš arenat, buktet vejolašvuođaid, lohká son.
– Mii sáhttit hervet kultuvrra fiinna sániiguin, muhto deháleamos lea ahte ásahuvvo buorre ja doaibmi kultuvra daidda ollu gehččiide gos Lávdi Finnmárkkus leat bargoaddit ja ahte váldet gehččiid duođalaččat, lohká Brynjar Strand Rasmussen.
