Sámiráđđi lea virgádan Anna-Marja Perssona, guhte lea eret Bååhnes Mátta-Sámis. Son galgá bargat prošeavtta «Njeaššeeatnamat Sámis» prošeaktajođiheaddjin.
Sámiráđđi lea virgádan Anna-Marja Perssona Árktalaš- ja birasossodaga prošeaktajođiheaddjin. Doppe son galgá bargat ovttas Gunn-Britt Retteriin. Persson lea Bååhnes eret, muhto ássá dál Romssas. Sus lea Masteroahppu guliid ja meahcceelliid hálddašeamis, ja bacheloroahppu ealliid buresbirgejumis ja etologiijas.
– Lean riegádan ja bajásšaddan boazodoallobearrašis Ruoŧa bealde Mátta-Sámis, nu ahte luondduhálddašeapmi lea álo leamašan dehálaš oassi mu eallimis. Dál illudan bargagoahtit daid áššiiguin Sámiráđis, dadjá Anna-Marja.
Stuorit prošeakta
Prošeakta «Njeaššeeatnamat Samis» lea oassin stuorát prošeavttas, «Arctic Wetlands Ecosystems – Resilience through restoration stewardship».
Ulbmil prošeavttain lea loktet máhtolašvuođa mo njeaššeeatnamat geavahuvvojit ja suddjejuvvojit boazodoalloguovlluin. Sámiráđđi galgá jođihit das prošeaktaoasi man namma lea «Indigenous uses and stewardship of wetlands ecosystems».
Prošeakta lea oassin Árktalaš Ráđi Conservation of Arctic and Fauna (CAFF) bargojoavkkus. Persson galgá maid bargat prošeavttain mii guorahallá mot dálkkádatrievdamat váikkuhit eatnamiid ekovuogádagaid. Dan čállá Sámeráđđi preassadieđáhusas.
