-Almmuhus-
OĐĐASATOđđa jahkegirji ilbmá

Ođđa jahkegirji ilbmá

-

-

Kárášjoga jahkegirji ilbmá ođđa govaiguin, earret eará leat Elisabeth Meyera govvat oaidnimis jahkegirjjis. 

– Illudat go ihtet ođđa govat maid jahkegirjjis čájehat, nu go Elisabeth Meyera Kárášjot-govat jagiin 1940 ja 1949, mat leat ođđa jahkegirjjis, čálliba jahkegirjedoaimmahusa  gulahallanolbmoguovttes  Gudrun E. E. Lindi ja Kirsten Pope preassadieđáhusas.  Govat galget šaddat čájáhussan maid plánet rahpat Kárášjogas beassážiid 2020. Govaid gaskkustit  almmá giela haga. Govat duođaštit eallindiliid ja leat duođaid ávkin Kárášjoga báikegottehistorjjá dokumentašuvdnii. 

Sámi giellajahki

2019 lea ON Eamiálbmotgielaid jahki – ja nu maid Sámi giellajahki.  ON mearridii sierra jagi eamiálbmotgielaid várás gievrudit eamiálbmogiid historjjá, kulturárbbi ja iešdovddu. Ollu unnitlogugielat leat jávkamin, ja nu leat máŋga sámegielage.

Sámi giellavahkus gieskat (golggotmánus) dollui báikehistorjáseminára Kárášjoga Servodatviesus.  Duogážin dasa lei go De Samiske Samlinger-searvi, dál SVD Musea- ja historjásearvvi namas,  ja dat searvi mii jahkegirjji almmuha, lea 80 jagi.

–  Doppe muitaleimmet jahkegirjebarggu birra, ja Sámi joatkkaskuvlla (SJS) nuorat fas muitaledje sámegiela ovdánahttinhistorjjá min guovllus, prošeaktabarggu maid ledje ráhkkanan moatti vahkus.  Hirbmat buorre bargu, čálliba  Gudrun E. E. Lindi ja Kirsten Pope.

 

-Almmuhus-