Gaskavahkku rabai Norgga stáhtaministtar, Jonas Gahr Støre, almmolaččat ođđa helikopterbása Romssas. – Ođđa bása nanne gearggusvuođa davvin, muitala Støre.
Davvi-Norgga ássit leat guhkit áigge bártidan dainna ahte eai leat doarvái gádjunhelikopterat, ja kapasitehta lea leamaš unnit davvin go muđui Norggas. Dan dihte leat dál ásahan ođđa gádjunhelikopterbása davás.
– Ráđđehus háliida nannet ássiid oadjebasvuođa Norggas. Davvin lea olu doaimmat sihke mearas ja duoddaris, ja ássiin leat guhkes mátkkit buohccevissui. Ođđa gádjunhelikopterbása Romssas nanne gearggusvuođa, čilge stáhtaministtar.
Gádjunhelikopterbása lea jo leamaš doaimmas suoidnemánu 1. beaivvi rájes, ja leat leamaš gádjunbarggut jo. Dát šiehtadus bistá guhtta jagi.
Justiisa- ja gearggusvuođaministara Emilie Enger Mehl mielas lea dehálaš ahte miehtá Norgga galgá buorre ja nana gádjunbálvalus.
– Dan dihte lea buorre go nannejit gearggusvuođa davvin maid, muitala Mehl.
