-Almmuhus-
OĐĐASATOđđa heaggagádjunrieggát ihtán Guovdageidnui

Ođđa heaggagádjunrieggát ihtán Guovdageidnui

-

-

Guovdageidnui leat johkagáttiide ja jávregáttiide dán geasi ihtán moanat govddodanrieggát mat adnojit heaggagádjumii. Isak Mathis O. Hætta lea prošeaktajođiheaddji ja lea váldán ovddasvástádusa daid heaŋgut.

Guovdageainnu suohkanii leat heŋgon oktiibuot 11 heaggagádjunrieggá, sihke boaittobealbáikkiide suohkana siskkobealde ja Guovdageainnu birrasis. Isak Mathis O. Hætta muitala ahte sus leat leamaš veahkit rieggáid heaŋgumii, ja dat leat viššalis geassebargit suohkanis geat dan leat dahkan.

Isak Mathis O. Hætta. Govven: Ovlla Gaup

 

Suohkan ožžon heaggagádjunrieggáid

Hætta muitala ahte Vesta nammasaš gávpesearvi lea váldán suinna oktavuođa ja fállan heaggagádjunrieggáid Guovdageainnu suohkanii.

– Mii leat nuvttá dáid rieggáid ožžon, muhto suohkanis lea bálkádoarjjasystema mii bálkáha geassebargiid barggu ovddas.

 

Vuojadanbáikkiide heŋgon

Jávregáttiin ja eatnogáttis lávejit olbmot vuojadit báhkkan, ja suohkanis leat ollu báikkit gos olbmot lávejit vuojadit.

 – Mii leat heŋgon rieggáid dan dihte go doppe vánddardit ja vuojadit ollu olbmot.

 

Rieggát iešguđet báikkiin

Hætta muitala ahte leat rieggáid heŋgon Suohpatjávrái, šalddi guovttebeallái, Jámetmieli bokte guovttebeallái, Vuorašjávrái, Stuorajávrái, Gievdneguikii, Nieidagoržái, Mázii ja Láhpoluobbalii.

-Almmuhus-