Ovddeš ráđđeolmmái Guovdageainnu suohkanis lea gearggus váldet vuostá ođđa hástalusáid
Mannan duorastaga, ođđajagemánu 10. beaivvi, doalai Guovdageainnu Bargiidbellodat nominašuvdnačoahkkima 2019 suohkanválggaid dáfus.
Nu go diehtit, de luohpá dálá sátnejođiheaddji ja Bargiidbellodatnjunuš suohkanpolitihkas ja studeregoahtá.
Dál sis lea ođđa njunuš gii galgá láidestit Bb jienasteddjiid boahttevaš njeallje jagi, namalassii Guovdageainnu suohkana ovddeš ráđđeolmmái, Mikkel Ailo Gaup.
Gaup oažžu mielde Inger Marit Bongo nuppi sadjái, ja Isak Mathis Buljo goalmmát sadjái.
Dálá sátnejođiheaddji, Johan Vasara, lea biddjon viđát sadjái ja sáhttá roahkka njuiket máŋga saji ovddos maŋŋel válgga. Njealját sajis lea Sara Ellen Anne Eira.
