Ođđa goahti huksejuvvo UiT:s

Joho-Niillasa darfegoahti lea čužžon UiT campusis, sámi kulturviesu, Ártna, bálddas, ja ovddit vahkku dat gaikkoduvvui. Dál galgá ođđa visti huksejuvvot.

UiT – Norgga Árktalaš universitehtas ja Sámi dutkamiid guovddážis (Sesam) lei gaskavahku, geassemánu 13.beaivvi, plánenčoahkkin darfegoađi birra.

Čohkkimis sii ásahedje bargojoavkku mii galgá gávnnahit movt sáhttá ovttastahttit symbolihka, dárbbu ja huksenteknihkalaš čovdosiid ođđa goađis.

– Bargojoavkkus lea Sesam instituhttajođiheaddji Niklas Labba, Romssa musea direktevra Lena Aarekol ja mun ieš, UiT viste- ja huksendirektevra, muitala Erland Loso Ávvirii.

Jurdagat movt ođđa vistti šaddá

– Mii leat bargojoavkkus ovttaoaivilis ahte ođđa visti galgá leat ovdáneapmi boares darfegoađis. Lea han dehálaš doalahit árbbi Joho-Niillasa maŋis, muhto seammás galgá boahtteáigásaš mii deavdá dálá dárbbuid ja funkšuvnna, dadjá Loso.

Son čilge ahte sii eai ollen buktit konkrehta jurdagiid ja ideaid ovdan, muhto ahte sis leat muhtin jurdagat juo dál.

– Ođđa visttis galgá seamma guoddinbielká go goađis, ja das eai galgga seamma viessogálvvut dego dábálaš lanjas. Das lea sihke árbevierru ja sámi identitehta, muhto lea seammás boahtteáigásaš. Das galgá maid seamma namma go darfegoađis, Joho-Niillasa.

Loso dadjá maid ahte ovddit goahti lei huksejuvvon nu ahte lei váttis áimmahuššat ja divvut dan. Ođđa visti galgá huksejuvvot nu ahte bistá guhká.

Gaskaboddasaš goahti

UiT áigu bargat Sesamain ovttas cegget gaskaboddasaš árbevirolaš goađi, ovdal go leat huksen bissovaš goađi.

Universitehtas lea dán jagi 50 jagi ávvudeapmi, ja dan oktavuođas galgá Norgga gonagas boahtit UiT:i.

– Mii eat dieđe áigut go rahpat gaskaboddasaš goađi čakčat go gonagas boahtá, vai semesterrahpamis borgemánu 14. beaivvi.

Sii soitet maid doallat kurssa studeanttaide movt goađi galgá cegget.