Davviriikkain jápmet eambbosat iešsorbmemii, go biilalihkohisvuođain, narkotihkageavaheapmái ja borasdávdii. Juohke nuppi beaivve guođđá nuorra olmmoš bearraša stuora morrašii, ja eatnašat leat gánddat.
Ingeborg Senneset lea čállán girjji «Ordbok for overlevelse». Girjji mihttu lea ráhkkanahttit nuoraid rávásnuvvamii ja birget eallimis. Girji sáhttá leat servodatsoaibman, vai mánáin ja nuorain leat veahkkeneavvut mo birget nuorravuođa eallimis ja ceavzit lossa beivviid.
Girji lea meidnejuvvon nuoraide, muhto girječálli oaivvilda ahte girji lea lihka dehálaš váhnemiidda, skuvllaide, dearvvašvuođabálvalussii – buohkaide geat gulahallet nuorain, vai sii sáhttet oaidnit makkár dillái nuorat sáhttet darvánit ja vai diehtá mo galgá dustet sin ja sin hástalusaid.
– Dál go ieš lean rávásnuvvan, de sávan ahte livččii vejolaš hállat alccen dalle go ledjen mánná ja nuorra. Geahččat unnoračča čalmmiide, ja muitalit dan sevdnjes áigodaga birra man čađa šaddá rahčat. Muitalit traumaid, borranváttuid, balu ja iešvahágahttima birra, ja muitalit ahte mun šattan dáid vásihit. Muhto eallin buorrána. Dán ledjen galgat dalle diehtit, muitala Senneset preassadieđáhusas.
Girjjis leat fáttát mas nuorat beroštit, nugo ovdamearkka dihtii rasisma, deavdit baksamiid, sexa, giellásat ja nu ain. Ingeborg váldá lohkki mielde iežas eallimii ja olmmoš beassá dovdat su dovdduid.
Ingeborg Senneset lea rahpasit muitalan iežas eallima birra, mo lei eallit anoreksiijain ja mo lei leat psykiatriija pasieanta. Dál son lea buohccidivššár, guhte bargá journalistan ja logaldallin.
