Luođoeallit eai beasa šat johtit guohtuneatnamiidda. – Geavatlaččat bidjat mii elliid hiŋgaliidda, lohká UiO – Oslo universitehta professor Atle Mysterud.
Luođoealliit, nu mo gottit, sarvagat ja ealggat dárbbašit johtit vai gávdnet doarvái guohtuma. Dát luođoeallit fertejit jagis johtit dihto guovlluide vai gávdnet dan biepmu maid dárbbašit.
– Norggas huksejit dađis stuorát ja eanet geainnuid. Geavatlaččat cagget dat luođoelliid lunddolaš johtingeainnuid. Eallit leat johtán dain guovlluin máŋggaid buolvvaid ja oahpahan maŋit buolvvaide maid gokko galgá johtit, lohká UiO biodieđalaš Instituhta professor Atle Mysterud.
Go elliid lunddolaš johtingeainnuid hehtte, de lea boađus ahte eallit eai oaččo doarvái biepmu. Áiggi mielde sirrejuvvojit eallit smávit joavkkuide ja genehtalaš variašuvdna goarrána. Dutkit leat dál dan mihtidan goddečorragiin. Mysterud oktan 92 eará dutkiiguin leat ráhkadan máilmmi vuosttaš átlasa mas beassá oaidnit gazzaspiriid johtingeainnuid. Dát bargu lea dahkon ovttasráđiid Ovttastahttojuvvon Našuvnnain.
Ulbmil bargguin lea oažžut mearrideddjiid vuhtii váldit luođoelliid lunddolaš johttingeainnuid ja guohtunbáikkiid, vai eai cakka elliid go huksejit geainnuid ja viesuid.
