Álbmotdearvvašvuođainstituhtta čuovvu dárkilit ođđa virusa mii lea dál máilmmis leavvamin.
Dát ođđa virus sáhttá dagahit bahás geahpesdávdda.
– Virusa leavvan lea vuordimis, ja mii fertet leat gergosat ahte njoammuduvvon olbmot sáhttet boahtit Norgii, dadjá Álbmotdearvvašvuođainstituhta seniorráđđeaddi Ragnhild Tønnessen preassadieđáhusas.
Máilmmi dearvvašvuođaorganisašuvdna WHO lea bovden heahtečoahkkimii go virusleavvan lea dagahan ahte njeallje olbmo leat jápmán dán dávdii. Dát ođđa coronavirusa dagaha geahpesboalddáhatlágan dávdda mas leat feber ja vuoigŋanhástalusat dávdamearkan. Dutkit oaivvildit dávdda sáhttit njoammut eallis olbmui. Kiinná eiseválddit dieđihit ahte virus njoammu olbmuid gaskka.
