Unjárgga gieldda ođđa gárraduodjelatnja Unjárgga Oahppogáldus lea rahppon ja gárvvis geavahussii.
Latnja maid leat váldán atnui gárraduodjelatnjan leamaš guorosin guhkit áigge. Dan mávssii sullii 1,2-1,3 miljovnna ruvnnu heivehit gárraduodjelatnjan oktan mašiinnaiguin, čállá Unjárgga gielda.
– Dát lea buoremus gárraduodjelatnja maid lean oaidnán ja mun lean oaidnán soames duodjelanja, logai duojár Per Andersen rahpamis, čállá Unjárgga gielda.
Andersen lea leamaš njunnošis gárraduodjelanja hábmemis. Lassin gárraduodjelatnjii lea doppe maid gievkkan, rádju ja hivsset.
Ožžon doarjaga
Eanaš oasi ruhtadeamis lea Unjárgga gielda gokčan, muhto Seastinbáŋku Davvi-Norga lea juolludan 100.000,- ruvnnu ja Sámi duodji Nuorta-Finnmárkku regiovdna ges 35.000,- ruvnnu, čállá Unjárgga gielda.
Skuvla váldá doaibmabáji duodjeoahpu geavahussii, muhto maiddái earát bohtet geavahit lanja.
Vuosttaš kursa álgá jo guovvamánu 21. beaivvi, maid Isak Saba guovddáš lágida ollesolbmuid várás.
