Duvle nammadii fylkkasátnejođiheaddji Tarjei Jensen Bech, Kristina Torbergsen, ođđa fylkkaráđđejođiheaddjin, Bjørn Inge Mo-rohkki sadjái. Dál lea fylkkaráđđejođiheaddji Torbergsen nammadan ođđa fylkkaráđi.
Dálá fylkkaráđis lea ain ovttasbargu gaskal Bargiidbellodaga, Guovddášbellodaga ja Sosialisttalaš Gurutbellodaga. Dat golbma bellodaga leat eanetlogus fylkkadikkis, ja leage parlamentáralaš eanetlohku fylkkadikkis go galget mearrádusaid dahkat.
– Mun lean hui duhtavaš dálá fylkkaráđiin. Mun lean bidjan deattu hárjáneapmái ja ahte galggašedje dovdat regiovnna. Dan dihte lean hui duhtavaš go fylkkaráđi ovttasbargobellodagain háliidedje joatkit. Bissovašvuohta leage dehálaš dál go mii galgat ovdánahttit Romssa ja Finnmárkku, seammás lea mis dehálaš bargu ovddabealde go galgat juohkit fylkkaid, muitala fylkkaráđđejođiheaddji Kristina Torbergsen.
Ođđa fylkkaráđđi álgá doaibmat ovttatmanos.
Dá lea ođđa fylkaráđđi:
Kristina Torbergsen, Bargiidbellodat, fylkkaráđđejođiheaddji
Ronald Wærnes, Guovddášbellodat, fylkkaráđi nubbejođiheaddji ja ekonomiija ja kultuvrra fylkkaráđđi
Karin Eriksen, Guovddášbellodat, plána ja birrasa fylkkaráđđi
Agnete Masternes Hanssen, Bargiidbellodat, johtolaga fylkaráđđi
Bjarne Rohde, Sosialisttalaš Gurutbellodat, máhtu ja ovttaidahttima fylkaráđđi
