Gaskavahkku beakkehii ahte Venor AS lea bákkus heaittihuvvon. Dakka maŋŋil dieđiha fitnodat Arctic Lavvo ahte sii buvttadišgohtet Venorlávuid
Gaskavahkku beakkehii ahte Venor AS lea bákkus heaittihuvvon. Dakka maŋŋil dieđiha fitnodat Arctic Lavvo ahte sii buvttadišgohtet Venorlávuid
Preassadieđáhusastis čállá Arctic Lavvo fitnodat ahte leat rámis go besset váldit badjelasat dovddus Venor lávuid buvttadeami.
Venor goađit ja lávut leat jahkeviissaid leamaš beakkánat buori kvalitehtaset geažil.
– Lea illu beassat viidásit fievrridit dáid buktagiid, čállá fitnodat.
20 jagi bargan Venoris
Arctic Lavvo joatká buvttadit lávuid Guovdageainnus.
Sølvi Bongo, Mathis Bongo, Marianne Bongo-Wiik ja Anders Bongo-Wiik leat fitnodateaiggádat. Buohkain leat sierra rollat, muhto Sølvi lea guovddážis buvttadeamis. Son álggahii iežas karrieara Venoris 1993:s, ja lea badjel 20 jagi bargan Venoris, gos lea sihke jođihan buvttadeami ja leamaš mielde hábmemis ja buktagiidovdáneamis.
Dáhttot diŋgojeddjiid ođđasit váldit oktavuođa
Eaiggádat sávvet leat gergosat buvttadišgoahtit golggotmánus, ja leat gergosat vuostáiváldit diŋgojumiid.
– Dađi bahábut eai gávdno dieđut ovddeš diŋgojumiid birra, ja mii sávvat ahte gálvooastit geat leat leamaš Venora ságain, dál ođđasit váldet oktavuođa Arctic Lavvoin vai diŋgojumit registrerejuvvojit, čállá fitnodat.
Venor AS lea 30 jagi buvttadan lávuid ja gođiid Guovdageainnus, fitnodaga lávejit danin gohčodit ođđaáigásaš lávu hutkin.
Venor lea vuovdán mearkanamas Arctic Lavvo fitnodahkii.