Márkomennui boahtá ođđa festiválabuvttadeaddji/beaivválaš jođiheaddji gaskamuttus ođđajagemánu. Magnus Storvoll Strømseth (23) váldá badjelasas doaimma ja galgá reidet 20 jagi ávvufestivála festiválajođiheddjiin Aili Guttormain.
Magnus Storvoll Strømseth lea Romssas eret ja lea leamaš oassin Márkomeanu čávas, sus lea máŋggabealat gelbbolašvuohta festiváladoaimmain maiddái eará festiválain.
Bargan Luondu ja Nuorat -organisašuvnnas
Maŋimuš jagiid lea Magnus bargan Luondu ja Nuorat -organisašuvnnas earret eará guovddášstivralahttun ja nubbijođiheaddjin, sihke politihkalaš váikkuhemiin, diehtojuohkinkampánjjaiguin ja organisašuvdnahuksemiin.
– Mii Márkomeanus leat ilolaččat go leat ožžon Magnusa festiválabuvttadeaddjin ja mii jáhkkit Magnusa heivet bures dán doibmii. Magnusis lea hui positiiva vuoigŋa ja ollu hutkás jurdagat, ja jáhkán son heive hui bures bargui Márkomeanu buvttadeaddjin, cealká festiválajođiheaddji Aili Guttorm preassadieđáhusas.
Illuda
Ieš Magnus Storvoll Strømseth (23) illuda váldit badjelasas doaimma.
– Illudan boahtit johtui bargguin lágidit Sámi čaffadeamos festivála ovttas erenoamáš buori bargoveagain geat leat sihke gilis eret ja geat bohtet olggobealde, dadjá son preassadieđáhusas.
Márkomeannu ávvuda 20-jagi ávvudeami 2019:s, ja lágiduvvo suoidnemánu 25.–28. b. 2019.
