Ođđa errennjuolggadusortnet álggahuvvo juovlamánu 29. beaivvi rajis.
Ráđđehus dieđiha iežaset neahttasiiddus ođđa errennjuolggadusaid birra olbmuide geat mátkkoštit ja bohtet Norgii eará riikkain. Sii geat bohtet olgoriikkas, sáhttet heaittihit errema áramusat čieža beaivvi ovdal, jus váldet guokte koronaiskosa go ollejit fas Norgii.
Buohkat mearridit ieža eaktodáhtolaččat áigot go iskojuvvot. Vuosttaš iskkus galgá váldot golmma beaivve duohken go lea ollen, nubbi iskkus galgá váldot áramusat čieža jándora maŋŋel go lea ollen. Jus ii iskka, dahje ii leat vejolaš, de ferte aŋkke logi beaivve erremis nu movt dábálaččat. Guokte iskosa fertejit váldot, muđui ferte logi beaivvi erremii.
Ortnet ii guoskka sidjiide geat leat leamaš Stuorra-Británnias maŋemus 14 beaivvi. Sii fertejit váldit iskosa, eaige oaččo oanehit errenáiggi.
