Boahtte vahkkus almmuhuvvo ođđa e-girji sámi mánáid várás, ja girji ilbmá sihke davvi-, julev- ja máttasámegillii.
Boahtte vahkkus almmuhuvvo ođđa e-girji sámi mánáid várás, ja girji ilbmá sihke davvi-, julev- ja máttasámegillii.
Girječálli Kari Stais girji Jakob og Neikob ilmmai 2011:s, dan rájes lea girji jorgaluvvon máŋgga gillii. Girji gávdno maiddái digitála hámis dáro- ja eŋgelasgillii. Boahtte vahkkus almmuhuvvo mánáidgirji maiddái e-girjin davvi-, julev- ja máttasámegielaide.
Háliidit ovddidit sámi girjjálašvuođa
Samlaget lágádus almmuha girjji, ja sii muitalit dán dahkat go háliidit mielde ovddidit sámi mánáidgirjjálašvuođa.
– Jurddaš mo livččii jus it šat gávnna girjjiid iežat eatnigillii, nu lea sámi mánáid dilli. Danin háliidit mii mielde ovddideamen sámegielat mánáid fálaldaga, lohká redaktevra ja prošeaktajođiheaddji Ragnfrid Tronhaug preassadieđáhusas.
Sensašuvdna
Mánáidgirji lea ožžon nama Joret ja Iiret davvisámegillii. Muitalus lea guovtti ustiba birra. Joret vástida juohke áššái «jo» ja Iiret ges «ii», mo de manná go soai galgaba dálostallat ovttas? Girji govviduvvo humoristtalažžan, ja girjelágádus oaivvilda ahte lea dehálaš buori girjjálašvuođa jorgalit sámegielaide.
– Lea sensašuvdna go dákkár interaktiiva girji ilbmá golmma sámegillii, dássážii leat eanaš sámegiel applikašuvnnat fátmmastan giellaoahpu, luonddu, kultuvrra ja ođđasiid, lohká Trohaug.
Ilbmá mánáidgárddis
Ođđa e-girji almmuhuvvo borgemánu 20. beaivvi Cizáš sámi mánáidgárddis Oslos.
– Girjealmmuheami oktavuođas ovdanbuktit ja čájehit mo geavaha ođđa buktaga. Mii leat maiddái bovden stuorradiggeáirasa ja Bargiidbellodaga ovddeš nubbinjođiheaddji Helga Pedersena, dieđiha lágádus preassadieđáhusas.
E-girjjit almmuhuvvojit sihke Andriode ja iOS buktagiid várás.
