Sálttu diggegoddi lea dubmen muhtin 50-jahkásaš dievddu čohkkát guokte jagi ja golbma mánu go lea rohcošan nebiin gii lei oađđime.
Dáhpáhus man ovddas dubmejuvvui, lei 2002:s dahje 2003:s, go nieida lei vuollel 16 jagi boaris.
Dat lea goalmmát áššemeannudeapmi Divttasvuona-áššiin, dieđiha NRK.
– Son ii mieđit iežas ráŋggáštussivalažžan, dajai dievddu bealušteaddji Tor Haug VG aviisii go áššáskuhttin almmuhuvvui.
Áigi gollan
Politiijaid dutkan gávnnahii 151 vejolaš rohcošanášši suohkanis. Rohcošeamit galget eanemusat geavvan nieiddažiid vuostá geat leat njealjejahkásaččat gitta 16-jahkásaččaid rádjái, politiijaid dieđuid vuođul.
Badjelaš 100 ášši leat heaittihuvvon, dan sivas go eanaš áššiin lea gollan beare guhkes áigi.
Politiijat dutkagohte áššiid Divttasvuonas maŋŋel go 11 nissona ja dievddu muitaledje rohcošandáhpáhusaid birra VG aviissas geassemánu 2016:s.
Juohke logi olbmos, geaid navdet rohcošandaguid čađahan áššis, de leat čiežas Divttasvuonas eret, politiijaid dieđuid mielde. Máŋgasis leat čanastagat gili lestadiánalaš birrasii.
(©NTB)
