Sis-Finnmárkku diggegoddi lea virgádan Risten Inga Henriksena ođđa duopmárfámohassan.
Risten Inga Henriksen lea 30 jagi boaris ja lea eret Guovdageainnus. Son válddii 2015:s juridihkalaš mastergráda riektediehtagis Romssa universitehtas. Son álgá Sis-Finnmárkku diggegoddái duopmárfámohassan ođđajagemánus 2020, čállá Sis-Finnmárkku diggegoddi preassadieđáhusastis.
Spesialiseren
Son lea iežas spesialiseren olmmošvuoigatvuođaide ja riikkaidgaskasaš eamiálbmotrivttiide. Dasa lassin lea sus čiekŋudeapmi siviila- ja ráŋggáštusproseassas erenoamášfága rievttálaš duođaštanteoriija bokte. Henriksen lea maid čađahan intensiivakurssa Columbia University álgoálbmotrievttis.
Gielalaš
Risten Inga Henriksen lea sámegielhálli (eatnigiella). Lassin dáro- ja eŋgelasgillii hálddaša son maid bures suomagiela. Son lea bargan advokáhttafámohassan advokáhttafitnodagas Bakke As ja advokáhttan advokáhttafitnodagas Lindstrøm AS. Advokáhttan lea son erenoamážit bargan fágasurggiin bargoriekti, ráŋggáštusriekti, árberiekti ja fásta opmodagaid riektediliin. Dasa lassin lea son bargan Geavaheddjiidráđi ráđđeaddin.