Scandic hotealla Kárášjoga ođđa direktevra Emma Järpell ja bargi Mona Larsen fitnaba guossoheamen kánelaboljáid Kárášjoga fitnodagaide Ruoŧa kánelabullábeaivvi.
Scandic hotealla Kárášjoga ođđa direktevra Emma Järpell ja bargi Mona Larsen fitnaba guossoheamen kánelaboljáid Kárášjoga fitnodagaide Ruoŧa kánelabullábeaivvi.
Mannan bearjadaga guovllasteigga guokte movttegis Scandic Hotealla Kárášjoga bargi Ávvir bargosadjái Kárášjohkii.
Soai, ođđa direktevra Emma Angelika Cecilia Järpell ja bargi Mona Irene Larsen, fitnaba buot fitnodagain ja guossoheaba kánelaboljáid.
– Mii álgit dál vuos kánelaboljáiguin. Lea mu vuosttaš mánnu hotealladirektevran dáppe ja lean vuos oahpásmuvvamin bargosajiin ja Kárášjogain, lohká direktevra Emma Angelika Cecilia Järpell moji dárogillii.
Su suopmanis gullo Mátta-Ruoŧa Skåne suopmana r-jietna dávisteamen go hállá. Duođašta son lea eret Skånes Ruoŧas.
Ávvir fuomáša maŋŋá ahte golggotmánu njealját beaivi han lea Ruoŧas kánelabolljábeaivi. Beaivvi ásahii Ruoŧa Hembakningsrådet (ruovttuláibunráđđi) Ruoŧas 1999:s.
Nuorra direktevra
Nuorra nisu Emma Angelika Cecilia Järpell muitala son deavdá golggotmánu 13. beaivvi 30 jagi.
– Go ledjen 21 jagi 2010:s, de bargagohten hoteallas ja mun lean dál fargga logi jagi bargan, lohká Emma Angelika Cecilia Järpell.
Ođđa bargui Kárášjohkii álggii son čakčamánu viđat beaivvi. Dássážii lea son hui bures loaktán Kárášjogas ja dál velá eambbo go muhtii.
– Lean bargan ja ássan logi maŋimuš jagi Oslos ja doppe mun lean fárren deike. Álgen skábmamánu viđat beaivvi. Ikte duorastaga lei kanelabolljábeaivi Ruoŧas ja heivii bures dál boahtit, vuosttaš muohta ja visot, guossohit didjiide kánelaboljáid, moddjá son hilbadit.
Jođiha váimmuin
Scandic hotealla Kárášjoga ođđa direktevra lohká Scandica evttohan Kárášjoga sutnje vuogas bargosadjin.
– Mu mielas lea hui gelddolaš boahtit dán hotellii mii mu mielas orru munnje rivttes bargosadji. Riekta dan dáfus go mu jođihanvuohki heive deike bures. Mun jođihan váimmuin, čilge Scandic Hotealla Kárášjoga ođđa direktevra, Emma Angelika Cecilia Järpell.
Lohká juohke olbmos lea iežas fitnodatjođihanvuohki.
– Liikon buot buoremusat beassat bargat hoteallas. Doppe dáhpáhuvvá álo juoidá ođas, ja olmmoš beassá oahpásmuvvat ođđa olbmuiguin juohke beaivvi, joatká son.
Muitala dál lea 17 fásta bargi hoteallas, muhto alimus geasi barget hoteallas birrasii 50 olbmo.
