Mannan mánnodaga ásahuvvui Sis- ja Nuorta- Finnmárkku diggegoddi/Indre og Østre Finnmark tingrett ođđa diggeriektin mas riektebáikkit leat Čáhcesullos ja Deanus.
Ođđa diggeriekti mielddisbuktá njuovžilvuođa áššemeannudeamis, go dán guovtti riektebáikki duopmárat ja áššemeannudeaddjit besset ovttas ja veahkkálagaid bargat. Dát dahká maid dan ahte ođđa diggerievttis nannejuvvo fágabiras gos eambbo duopmárat ja áššemeannudeaddjit barget ovttas.
– Ovttaskas diggeáššit meannuduvvojit seamma láhkái go ovdal. Áššit mat ovdal gulle Nuorta-Finnmárkku diggegoddái, šaddet eanáš meannuduvvot Čáhcesullo riektebáikkis, ja seamma guoská Deanu riektebáikái. Spiehkastagat sáhttet leat, erenoamážit riektesála kapasitehta ja aktevrraid sávaldagaid ektui, čállá Sis-ja Nuorta-Finnmárkku diggegoddi preassadieđáhusas.
Deanu riektebáikkis gártá leat váldoovddasvástádus čuovvulit áššiid mat meannuduvvojit sámegillii, ja gos Sámi dimenšuvdna muđui lea mearkkašahtti.
