– Ođđa Deanu šaldi šaddá eananmearka

Ođđa Deanu šaldi huksejuvvo 100-jagistandára mielde, ja vuođđun leat buorit arkitektonalaš čovdosat mat galget doaibmat erenoamáš luonddus. Detnui lasihuvvo liige vásáhusárvu, seammás go čoahkkebáiki šaddá eanet geasuheaddjin, čálle Stáhta geaidnodoaimmahat.

– Mii ovttastat njunuš ođđaáigásaš teknologiija, seammás go váldit vara Deanu erenoamáš birrasis ja kultuvrras, dadjá ossodatdirektevra Bjørg-Anita Joki Stáhta geaidnodoaimmahagas Finnmárkkus.

Ođđa šaldi galgá leat gárvvis 2019:s.

Dás oainnát filmmaža das makkár ođđa šaldi šaddá olggosoaidnit:

Eananmearka

– Šaldetoardna mii šaddá 95 mehter alu ja mas galgá leat miellagiddevaš čuovgadesigna, dagaha ođđa šaldi eananmearkan. Šaldi, mii šaddá oktiibuot 260 mehter guhko, šaddá maid Nuorta-Finnmárkku stuorimussan, čállá Stáhta geaidnodoaimmahat.

Ođđa šaldi leat rehkenastán gártat máksit 578 miljovnna ruvnnu, oktan geainnuiguin ja vázzin- ja sihkkelastingeainnuiguin.

Stuorradiggi lea juolludan 30 miljovnna dán jagi bušeahtas, maŋimuš oassi ruhtadeamis boahtá Našunála fievrredanplánii 2018-2029 áigodaga ovddas.

Ođđa vásáhusat

Dálá šaldi Deanu rastá, huksejuvvui 1948:s iige guotte šat daid losimus fievrruid. Stuorát fievrrut eai ge sáhte ovddal boahtit, go šaldi lea vuollet guhtta mehter govddu.

– Ođđa šaldi šaddá 14 mehter govddu, ja das šaddet vázzingeainnut goappáge ravddas. Nu besset sihke báikkálaš olbmot ja turisttat vásihit joga šaldi alde, čállá geaidnodoaimmahat. 

Ođđašaldi huksejuvvo birrasiid 100 mehtera bajábeallai dálá šaldi, nu guorrana maid areála Deanu šaldis gilis.

Šaldái ráhkaduvvo maid erenoamáš čuovgadesigna, man sáhttá programmerehit nu ahte rievddada birra jándora ja jahkodagaid mielde, iešguđet ivnniiguin ja effeavttaiguin. Šaldis eai ge galgga leat dábálaš čuovgastoalpput, muhto čuovggat galget baicce integrerejuvvot ravdarindii.

Eanet ođđa šaldi birra sáhtát lohkat dáppe.