-Almmuhus-
SMÁVVAOĐĐASATOđđa boazodoallo­stivra namma­duvvon

Ođđa boazodoallo­stivra namma­duvvon

Journalista

-

-

Eanandoallo- ja biebmodepartemeanta lea nammadan ođđa boazodoallostivrra, mii doaibmá guovvamánu 2. beaivvi 2023 rájes juovlamánu 31. beaivvi 2026 rádjái.

– Boazodoallostivra, mii doaibmá bures, lea mávssolaš boazodoallopolitihka ollašuhttimii. Lean duhtavaš, go leat nammadan boazodoallostivrra, mas lea govttolaš geográfalaš juohku, máŋggabealat duogážat ja buorre sohkabealledássádat, dadjá eanandoallo- ja biebmoministtar Sandra Borch preassadieđáhusas.

Jođiheaddji joatká

Inge Ryan joatká boazodoallostivrra jođiheaddjin ođđa njealje jagi guhkes áigodaga. Maiddái Ragnhild Sparrok Larsen guovttos Asgrim Opdalain joatkiba. Stivrra ođđa áirasat leat Hege Føsund Christiansen, Ellinor Marita Jåma, Anders Johansen Eira ja Peder Ingar Buljo.

Duogáš dieđut

Boazodoallostivra lea almmolaš hálddašanorgána, mii doaimmaha iešguđetlágan áššiid boazodoallolága vuođul, dahje dan vuođul addojuvvon mearrádusaid vuođul. Dat veahkeha maid eiseválddiid olahit bajit dási ulbmiliid, maid Stuorradiggi mearrida boazodoallopolitihkkii. Stivra galgá maid addit fágalaš rávvagiid boazodoalu hálddašeapmái, boazodutkamii ja bagadallanbálvalussii.

Boazodoallostivrras leat čieža lahtu ja sin persovnnalaš várrelahtut. Eanandoallo- ja biebmodepartemeanta (EBD) nammada jođiheaddji, golbma lahtu ja sin várrelahtuid. Sámediggi nammada golbma lahtu. Boazodoallolága § 71 vuođul galgá boazodoallostivrra nammadeamis «deattuhit govttolaš ovddasteami iešguđet guovlluin, viiddis fágalaš duogáža ja servodathárjáneami, ja nu ovtta meari olbmuid goappá nai sohkabealis go vejolaš».

Norgga Boazosámiid Riikkasearvi (NBR) evttoha sihke EBD:i ja Sámediggái geat heivešedje Boazodoallostivrra lahttun.

Gáldu: Ráđđehus

-Almmuhus-