Ráđđehus doallá skuvllaid ja mánáidgárddiid gitta guokte vahkku vel. Tonje Iren Anti geahččala kombineret iežas barggu seammás go lea oahpaheaddji su mánáide mat dal fertejit guhkit leat ruovttus.
Ráđđehus almmuhii disdaga ahte buot doaimmaid maid bidje johtui njukčamánu 12. beaivve, jotket mannjel beassážiidda, cuoŋománnui 13. beaivái. Dat mearkkaša buot skuvllat ja mánáidgárddit leat ain gitta, ja váhnemat fertejit ruovttus bargat jus ii leat mánnageahčči. Váhnemat geat leat servodatkritihkalaš doaimmas ožžot ain fálaldaga doalvut mánáid skuvlii dahje mánáidgárdái.
Tonje Iren Anti bargá báŋkkus, muhto dal lea ruovttokantuvrras. Sus leat guokte mánáidskuvlla máná mat ferteba ruovttus leat dál go skuvllaid leat gidden. Dassážii lea Anti leamašan ruovttus guokte vahkku mánáiguin, ja dal ferte unnimus guokte vahkku vel leat ruovttus.
– Mu mielas gal lea hui buorre go jotket doallat skuvllaid ja mánáidgárddiid gitta, muhto seammás lea dieđusge lossat leat váhnen ja bargi oktánas. Mun in olle álo bargat barggu doaimmaid, go bealli mu beaivvis manná gohkket mánáid. Dávjá ferten eahkedis bargat, dadjá Anti.
Deaivvadit olbmáiguin neahta bokte
Ráđđehus ii leat dušše gidden skuvllaid ja mánáidgárddiid, muhto maiddai vuojadanhállaid, borranbáikkiid, olu stuorra- ja unna rámbuvrraid ja eará viesuid gosa čoahkkanit olu olbmot. Disdaga dieđihii ráđđehus ahte dal galget olbmot doallat guokte mehtera gaska, ja eai berre leat eambbo go vihtta olbmo mat čoahkkanit olgun, muhto dat ii guoská sidjiide geat leat seamma bearrašis dahje orrot ovttas. Muđui ii leat dal lohppii vuolgit bartii jus dat lea eará suohkanis.
Anti mánát eaba beasa dal deaivvadit olbmáiguin. Mánáguovttos váillaheaba dan dábálaš árgabeaivvi ja skuvlla. Anti movttiidahttá mánáid iešguđet čovdosiiguin.
– Mánát gal váillaheaba skuvlla, goit dan sosiála ektui. Sudno agis lea stuorra gaska, boarrásat lea 12 ja nuorat ges 6 jagi. Muhto lean dal šiehtadan eará váhnemiin ahte mánát sáhttet deaivvadit Skype bokte. Ja boahtte vahkkus bohtet deike mu irggi mánát, nu ahte sii gal de stohket bures ovttas. Orro hui olu eambbo hommá go oktiibuot leat njeallje máná ruovttus, muhto dat lea mu mielas álkibut. De ii leat šat agis stuorra gaska, go irggi mánát leaba 8 ja 13 jahkásaččat. Muđui mii finadit barttas vuoi beaivvit mannet. Min barta lea maid lihkus seamma gielddas gos mii muđui orrut, dadjá Anti.
Rutiinnat
Ráđđehus lea bidjan johtui dáid doaimmaid vuoi koronavirus ii njoamo oktanaga buohkaide. Dalle lea dehálaš sihkkarastit sin geat šaddet hui buohccin, jus lea koronavirusa dihte dahje eará ákkat, ahte sii ožžot dan veahki dearvvašvuođabálvalusas. Ja ahte dearvvašvuođabálvalussii ii šatta menddo stuorra noađđi.
Anti váldá eiseválddiid rávvagiid duođalaččat ja doalaha daid. Son lea ráhkadan rutiinnaid vuoi árgabeaivvi hástalusat čovdojuvvojit.
– Min árgabeaivvis leat ođđa rutiinnat mat veahkehit min buohkaid čađahit sihke skuvlabargguid ja mun ollen goit veaháš iežan barggu maid dahkat. Mun láven iđđes geahččat mánáid vahkkoplána ovdal go bovttán sudno, ja das maŋás čájehan ja veahkehan skuvlabargguiguin. Livččii gal olu álkit jus skuvla ieš doalašii oahpahusa neahta bokte, vuoi mun ollen bargat. Muhto mii gal birget, dadjá Anti.
