Sámediggeráđi bušeahttaevttohusas 2021 leat ođđa áŋgiruššamat earret eará oahpponeavvuid, museaid ja giellasuorggi oktavuođas.
– Dán jagi bušeahttavuoruhemiiguin olahišgoahtit mii gudneáŋgiris Muohtačalmmit-julggaštusa duohtan dahkama, dadjá Olsen sin preassadieđáhusas. Muohtačalmmit lea politihkalaš vuođđoáššebábir man vuođul eanetlohkojoavku lea stivren Sámedikki maŋŋá válgga 2017.
Museat
Okta dán jagi áŋgiruššamiin lea máttasámi musea ja kulturguovddáš Saemien Sijte Snoasas, mii oažžu 2,7 miljon ru. lasáhussan. Juolludus manná earret eará stuorát fágalaš kapasitehtii museas go fárre ođđa vistái, ja lassánan viessoláigui.
– Sámediggeráđđi lea hui duhtavaš go Saemien Sijte ođđa lokálat gárvánit ja sáhttá fárret 2021:s, dadjá Olsen.
Dasa lassin lasihuvvo doarjja sámi museasearvái 350 000 ruvnno searvvi fágalaš ja hálddahuslaš birrasa nannemii ja Deanu ja Várjjaga museasiidii 250 000 ruvnno dávviriid máhcaheami oktavuođas mii lea oassi Bååstede-prošeavttas.
Sámi kulturviesut
– Sámi kulturviesut dárbbašit árvvolaš lokálaid ja Sámediggi háliida ahte eanet sámi kulturviesut duohtan dahkkojuvvojit. Danne illudahttá go ráđđehus čuovvula Sámi Našunálateáhter Beaivváža huksema, ja Sámediggi lea álggahan ceahkkeplána teáhtera rekrutterenbarggu nannema várás dassážii go visti gárvána, dadjá Olsen. Lasáhussan lea evttohuvvon 600 000 ruvnno 2021:s.
Mearrasámit
Dása lassin evttoha sámediggeráđđi lasihit juolludusa Mearrasiidii, 300 000 ruvnno. Mearrasiida lea čájehan rahpama rájes 2003:s ahte lea dárbu oažžut máhtu mearrasámi fáttáid birra, ja oažžut mearrasámi gaskkustanarena, ja máhttolonohallama.
Buorit čađahannávccat
Sámediggeráđđi lea maiddái válljen bidjat ođđa guovddáža njuolggadoarjagiidda, dat lea Girjjálašvuođaguovddáš.
– Sámi girjjálašvuođa gaskkusteamis lea stuorra vejolašvuohta, ja guovddážis lea deaŧalaš rolla das. Guovddáš lea ollu jagiid ožžon doarjaga ohcanvuđot ortnegiid bokte, ja lea čájehan ahte sis leat buorit čađahannávccat, loahpaha Olsen.
Sámedikki 2021 bušeahtta mearriduvvo dievasčoahkkimis juovlamánus.
