Romsii álggahuvvo ođđa alit guovddáš, mii galgá váikkuhit mearra- ja arktalaš gažaldagaid.
Ođđajagemánu 1. beaivvi boahtte jagi rahpá ráđđehus ođđa mearra- ja árktalaš gažaldatguovddáža Romssas, FRAM-guovddažis.
– Guovddáš galgá váldit fárrui buot našunála fágabirrasiid mat beroštit mearragullevaš ja árktalaš gažaldagain, ja galgá váikkuhit ja veahkehit min go galgat meannudit dehálaš mearrádusaid ja ráhkadit ođđa strategiijaid mat galget ovddidit alit ekonomiija, muitala guolástusministtar Per Sandberg (FrP) preassadieđáhusas.
Vihtta miljovnna ruvnno
2018:s ráđđehus evttohii juolludit vihtta miljovnna ruvnno ođđa mearra- ja árktalaš gažaldatguovddážii.
Guovddáš galgá bargat dálá máhtuin ja dutkamiin, buohtastahttit ja iskat daid, ja buktit ovdan bohtosiid našunála ja internašunála gehččiide.
Stuora rievdadusat davvin
– Mii leat vásihan ja vásihit stuora rievdadusaid mat leat čadnon dálkkádahkii, birrasii, demografiijai, ekonomiijai ja teknologiijai mat váikkuhit luondduresursaávkkástallama ja árvohuksema davviguovlluin ja Arktiisas. Lea dárbu oažžut eambbo fágaidgaskasaš iskosiid mat čájehit movt Norgga meara ja mearragátti beroštumit ja doaibmavejolašvuođat váikkuhuvvojit, muitala ealáhusministtar Monica Mæland (Olgeš).
Guovddáža bargit
Ođđa guovddážis galgá bargat joavku masa leat válljejuvvon bargit sihke Romssa universitehtas (UIT), Mearradutkaninstituhtas, Polárainstituhtas, Akvaplan-Nivas, Nofimas ja Innovašuvdna Norggas.
Daid bargu lea ráhkadit bargoplána ja modealla movt jođihit bargguid ja movt organiseret bargguid, ja dasa lassin jođihit ođđa guovddáža. Nofima galgá doaibmat guovddáža čállingoddin.
