Dan rájes go fárrejedje Guovdageainnu Lagasradio studioi 2004:s, lea buot leamaš juste nu movt dalle lei. Dál lea measta buot ođas, ja doaimmaheaddji Nils Martin Kristensen lea hirbmat moivttet dainna.
– Mii fárriimet deike 2004:s, ja dan rájes ii leat mihkke ođastuvvon dáppe ovdal go dál. Dál lea measta buot ođas, ja lea hui modearna dáppe dál, muitala Guovdageainnu Lagasradio doaimmaheaddji Nils Martin Kristensen duhtavaččat Ávvirii.
Measta buot ođastan
– Álggos oaččuimet ođđa miksenbeavddi, ja de jurddašeimmet ahte dál gal juo juollut ođastit olles studio. Mii máliimet seinniid, ja bijaheimmet eanet el-čuggestagaid deike. Ovdal ledje dat hirbmat unnán, ja nu ledje el-rávdnjejohtasat sorron miehtá deike nu ahte lei dego spaghetti, muitala Nils Martin.
Buorránii loaktin
– Mii leat nai stohpogálvvuid sirddášan ja bassan birra, ja bijaimet ođđa, ergonomalaš studiobeavddi. Ovdal ledje dáppe sevdnjes láhtteránut miehtá láhtti, muhto dál bijaheimmet dakkár čuvgesránes lamináhta. Dál gal lea hui čaffat dáppe, ja nu buorrána ge mokta ja loaktin nai. Lea nu čuovgat dáppe ahte ii leat báljo jáhkehahtti, dadjá son.
Eai ožžon vehkiid
GLR lei sosiála mediaid bokte ohcan guoddinvehkiid ovdalaš go ođastišgohte, muhto eai lihkostuvvon gal nu galle veahki oažžut.
– Eai lean gal jur ráidun dás čuožžume olbmot, dan gal sáhtán dadjat. Leat min iežamet mielbargit mat leat bargan eanas oasi, ja muđui maid barggai elekrihkkár Totti, ja snihkkár Ánte Palojärvi, gii divodii uvssaid dáppe mat ledje visot heaŋggagan. Dál doibmet buot uvssat nu movt galget, muitala doaimmaheadjdi.
Guokte vahku orron studios
– Min viššališ eaktodáhtolaš mielbargit dat guottašedje ja máledjedje, ja sii ánssášit hui ollu rámi, rámpo Nils Martin, ja muitala vel ahte soai leaba journalisttain Isak Nils Hættain orron doppe measta birra jándora juo guokte vahku. Dál ii livččii vel ollu, ja de lea buot áibbas gárvvis studios.
Beallehaddái ožžo miksenbeavddi
Son lea maid hui duhtavaš go ožžo vejolašvuođa ođastit miksenbeavddi:
– Mis lei nai nu lihkku ahte oaččuimet oastit miksenbeavddi beallehaddái. Dat lea máilmmi buoremus mearka vel. Osttiimet dan muhtun lágideaddji bokte Bergenis, Oslo TV2:s. Dat lea oba divrras ođasnaga, muhto go oaččuimet nu hálbái, de gal sáhtiimet oastit dan. Dainna sáhttit dahkat feara maid, ja das lea hui buorre jietna, muitala Nils Martin.
