Doarjjaortnegat sámi ja kvena/norggasuopmelaš ulbmiliidda Finnmárkkus leat ožžon ođđa njuolggadusaid.
Romssa ja Finnmárkku fylkkaráđđi mearridii čoahkkimis ođđajagemánu 17. beaivvi 2023 ođđa njuolggadusaid ortnegiidda «Ruđat sámi ulbmiliidda Finnmárkkus» ja «Ruđat kvena/norggasuopmelaš ulbmiliidda Finnmárkkus».
– Fylkkaráđđi háliida ođđa njuolggadusaiguin dahkat guovllolaš váikkuhangaskaomiid čađačuovgibun ja diehttevaččabun, ja váfistit rabas ja beaktilis ohcamušmeannudeami, čállá čállá Romssa ja Finnmárkku fylkkagielda preassadieđáhusas.
Guokte fásta áigemeari
Sii čilgejit ahte deaŧalaččamus rievdadus lea, ahte dáin doarjjaortnegiin eai šat galgga jotkkolaš ohcanáigemearit, muhto guokte fásta jahkásaš áigemeari. Ulbmil lea dahkat doarjjaortnegiid eanet fátmmasteaddjin ja diehttevažžan ohcciide, ja maiddái čalbmoseabbon ja beaktileabbon hálddahuslaččat.
Sámi ruđat leat ožžon ohcanáigemeriid golggotmánus ja cuoŋománus. Vuosttaš ohcanáigemearri ođasmahttima maŋŋel lea cuoŋománu 1. beaivvi 2023 doaibmabijuide mat čađahuvvojit jagi 2023. Dán maŋŋel gustojit jahkásaš áigemearit golggotmánu 1. beaivvi ja cuoŋománu 1. beaivvi.
Kvena/norggasuopmelaš ruđat leat ožžon ohcanáigemeriid skábmamánus ja miessemánus. Vuosttas ohcanáigemearri ođasmahttima maŋŋel lea njukčamánu 1. beaivvi 2023 doaibmabijuide mat čađahuvvojit jagi 2023. Dán maŋŋel gustojit jahkásaš áigemearit skábmamánu 15. beaivvi ja miessemánu 15. beaivvi.
Galget nannet giela ja kultuvrra
Lassin leat dahkkojuvvon muhtin aiddostahttimat ja lasáhusat njuolggadusaide.
– Ruđat juhkkojuvvojit doaibmabijuide mat ovddidit ja nannejit sámi giela ja kultuvrra ja kvena giela ja kvena/norggasuopmelaš kultuvrra. Doarjjaortnegat ruhtaduvvojit guvllolaš ruđaiguin, mat juolluduvvojit jahkásaččat fylkkagieldda bušeahta bokte. Jahkásaš bušeahtat lea 100 000 kruvnnu kvena/norggasuopmelaš ulbmiliidda ja 475 000 kruvnnu sámi ulbmiliidda, čállá fylkkagielda.
