-Almmuhus-
-Almmuhus-
-Almmuhus-
OĐĐASATOđasmahttet Nyland ja Åsgård studeanta­ásodagaid

Ođasmahttet Nyland ja Åsgård studeanta­ásodagaid

-

-

Ráđđehus lea juolludan 34,5 miljovnna ruvnno Davvi-Norgga studeantaovttastusaide.

Máhttodepartemeanta čállá preassadieđáhusas ahte lea juolludan oktiibuot 250 miljovnna ruvnno ođasmahttit studeantaásodagaid miehtá Norgga. Davvin lea Norgga árktalaš studeantaovttastus ožžon 28 900 000 ruvnno. Das adno 11,9 miljovnna Nyland studeantaásodagaide Álttás, ja 17 miljovnna Åsgård studeantaásodagaide Romssas.

Studentinord studeantaovttastus Bådådjos oažžu 5,6 miljovnna ruvnno Flatvold ásodagaide.

– Dá lea buorre ođas sihke studeanttaide ja huksensuorgái. Ásodagat ođastuvvojit, seammás go doalahit doaimma huksensuorggis miehtá riikka, muitala dutkan- ja alitoahppoministtar Henrik Asheim (O) preassadieđáhusas. Eaktun oažžut doarjaga lea ahte álggahit barggu dán jagi juo.

Norgga árktalaš studeantaovttastusa hálddahusdirektevra Hans Petter Kvaal muitala Ávvirii ahte sis leat máŋga boares ásodaga, ja danne ohce doarjaga ođasmahttet ásodagaid.

Hans Petter Kvaale. Govva: Norgga árktalaš studeantaovttastusa preassagovva.
Hans Petter Kvaale. Govva: Norgga árktalaš studeantaovttastusa preassagovva.

– Daid lea dárbu ođasmahttit ovdalii go dan ahte hukset ođđa. Mii oaččuimet dan ruhtasupmi maid ozaimet, ja dainna leat hui duhtavaččat. Dat veahkeha ollu, muitala Kvaal.

Kvaal dieđiha ahte áigot Åsgård studeantaásodagain lásiid ja basadanlanjaid ođasmahttet. Seamma Nyland studeantaásodagain maid, muhto doppe áigot vel gievkkaniid ođasmahttet.

– Eanas barggut sáhttet čađahuvvot dainna lágiin ahte studeanttat eai dárbbat fárret. Eará bargguid ges geahččalit bargat dalle go studeanttat eai leat doppe, nu go luomuin.

-Almmuhus-