-Almmuhus-
MAGASIIDNAOažžu Ubmejen biejvieh nuoraidstipeandda

Oažžu Ubmejen biejvieh nuoraidstipeandda

-

-

Odne geige Ubmejen Biejvieg nuoraidstipeandda «Sameblod» neavttárii Lene Cecilia Sparrockii.

Ubmejen Biejvieg dahje Upmi sámi vahkku, geige odne nuoraidstipeandda guoktenuppelogát geardde.

Dán jagi oažžu Lene Cecilia Sparrock stipeandda. Dan dieđiha Ubmejen Biejvieg preassadieđáhusas.

 

Váldorolla neavttár

Sparrock neaktá váldorolla Amanda Kernell «Sameblod» filmmas.

Stipeanda galgá doarjut sámi nuoraid identitehta nannema.

Stipeanda addo ovtta dahje máŋgasiidda geat áŋgiruššamiin, hutkáivuođain ja jođihemiin ovddidit ođđa jurddašan málliid ja ovdáneami sámi servodagas ja kultureallimis.

 

Lene Cecilia lea 19 jagi ja boahtá boazodoallobearrašis, Smalåsenis Norggabealde. Son ja su orohat vuosttaldedje stuora bieggamillohuksema sin orohahkii Kalvvatnii, ja vuite ášši.

Diibmá son gearggai duodjeskuvllas, gos son logai dipmaduoji ja designa. Dál son lea boazodoallooahpahalli Vongelhnjaarke orohagas.

Dál lea áigeguovdil «Sameblod» filmmain, mas neaktá váldorolla, Elle Marjja.

 

– Áŋgir ja duostil

Ubmejen Biejvieg čállá preassadieđáhusas ahte Sparrock oažžu stipeandda áŋgiruššama ja duostilvuođa dihte.

– Son lea nagodan kombineret su kultuvrralaš áŋgiruššama boazodoaluin, mii lea su váimmu lagamusas. Son lea buorre ovdagovva eará nuoraide, iežas čeavláivuođain, gielain ja duostilvuođain, čállet sii.

 

Lene Cecilia Sparrock ii šatta searvat doaluide odne, gos stipeanda geigejuvvo. Son lea Parisas, Creteil riikkaidgaskasaš nissoniid filbmafestiválas. Sameblod lea okta filmmain mii čájehuvvo festiválas.

Stipeanda lea 5 000 ruvnno, ja vuoiti oažžu vel diploma Såhkie-Umeå sámi searvvis.

-Almmuhus-