Álbumas leat sihke árbevirolaš luođit ja luođit maid ieš lea komponeren
Sámediggeráđđi lea juolludan 218 000 ruvnnu Gabba – luohtemeašttir John André Eira oktan joavkkuin – álbuma báddemii ja almmuheapmái.
Almmuheapmi lea debutalbuma viidásat ovddideapmi ja ovttasbargu sámi teakstačálliiguin geat leat sániid bidjan luđiide maid Eira ieš lea komponeren. Báddemis ja almmuheamis lea maid ovttasbargu eará árbevirolaš juigiiguin ja nu lea šaddan polyfona juoigan ja nu gohčoduvvon «call and respons».
– Prošeakta lea gelddolaš danne go iešguđet juoiganvierut leat oaivadan barggu. Dat lea oalgguheaddji earenoamáš jienain ja gudnejahttá sámi árbevieruid. Mun jáhkán almmuheapmi váldojuvvo bures vuostá sihke Norggas ja riikkarájáid nuppe bealde, dadjá sámediggeráđđi Maja Kristine Jåma preassadieđáhusas.
Doarjja juolluduvvo Luohti ja sámi musihka ortnega bokte.
