– Máze heahteveahkkejoavku lea stuora dorvun midjiide geat orrut Mázes, danin ánssášit sii liige juovlafuomášumi, lohká Marit Inga Utsi.
– Máze heahteveahkkejoavku lea leamašan stuora ávkin dan moatte háve go lean vásihan sin barggus. In leat ieš dárbbašan veahki sis, muhto lean guovtte geardde leamašan dakkár báikkis gos lea leamašan dárbu sin veahkkái, čilge Marit Inga Utsi, gii lea nammadan Máze heahteveahkkejoavkku árgabeaisáŋgárin.
Máze akuhttaveahkkejoavkkus lea báikkálaš vuosttašveahkit váldet vára duođalaš buhcciin dehe roasmmuhuvvan olbmuin dassážii go profešunealla veahkki olle.
Dorvun
Marit Inga Utsi lohká ahte sidjiide geat orrot doaresbealde lea dat joavku stuora dorvun. – Sii bohtet ja orrot dassá go doavttir ja ambulánsa olle. De beassá olmmoš luoitit olggiid go sii ollejit.
Marit Inga háliida vel namuhit ahte sii eai fála dušše veahki pasieanttaide. Son muitá dáhpáhusa go son bođii biilalihkohisvuođabáikái gosa gádjunhelikopter maid bođii. Dat čuozai sutnje garrasit ja čierrugođii issorasat. Dalle ledje maid heahteveahkkejoavkku olbmot geat jeđđejedje su.
– Buorre namahus
Marit Helene Eira, Kent Ailo Hætta ja Johan Turi leat golmmas geat leat mielde dan joavkkus ja geaidda Ávvir geige juovlaskeaŋkkaža.
– Árgabeaisáŋgár go … Johan Turi dego máisttohallá sáni ovdal go dadjá:
– Na, dat gal lea buorre namahus. De várra lea jurddašan ahte diet dat lea dat albma geat gádjot olbmuid.
Johan muitala ahte sii leat oalle stuora joavku ja álo jullot moadde olbmo go gohččojuvvojit olggos. Marit Helene lasiha ahte sii dábálaččat leat guovttis dahje golmmas geat vulget go soames dárbbaša veahki.
Lea medisiinnalaš veahkketelefuvdna 113 (AMK) man vuođul diehtu manná heahteveahkkejovkui. Máze heahteveahkkejoavku gohččojuvvo birrasii loge geardde jahkásaččat dakkár bargui.
Marit Helene čilge ahte dat dáhpáhusat maidda sin gohččot leat dat maid AMK gohčoda ruksesdáhpáhusat, mii mearkkaša ahte dat leat duođalaš dáhpáhusat dahje olmmoš lea duođalaš buohcci.
– Min bargun de lea ollet jođánit olbmo lusa ja addit vuosttašveahki, dassá go doavttir ja ambulánsa olle, muitala Kent Ailo Hætta, gii lea Máze heahteveahkkejoavkku jođiheaddji dál.
Johan Turi muitala vel ahte sin váldet buohkat hui bures vuostá: – Jáhkán go olmmoš lea buohcci, de ii beroš earret das ahte oažžu veahki maid dárbbaša.
Juovlamánu geiget mii Ávviris juovlafuomášumi olbmuide geat ánssášit liigefuomášumi barggu ovddas maid dahket illun earáide. Cavgil midjiide gii ánssášivččii juovlafuomášumi. Čális e-poastta post@avvir.no. Čális oanehaččat manne juste dat olmmoš ánssášivčče juovlafuomášumi.
