Deanu boanda Britt Mari Andersen oažžu Sámedikkis doarjaga investeremiidda.
Britt Mari Andersen doaimmaha mielkebuvttadeami Deanus ja áigu lasihit ođđa biebmanguovddáža náveha lusa. Dohko biddjo ođđa biebmanrusttet mii sáhttá seaguhit fuođđariid ja buoridit dan biepmu maid gusat ožžot ja borret.
– Lea somá go mii sáhttit leat mielde doarjume diliid mat buktet buori ovdáneami ealáhusas. Sisaváldin roavvafuođđariin lea stuora mearkkašupmi biergo- ja mielkebuvttadeapmái ja doaivut ahte dat investeren sáhttá buoridit doalu ekonomiija , dadjá sámediggeráđđi Elisabeth Erke preassadieđáhusas.
Galledii boandda
Erke galledii mannan vahkku boandda Deanus ja geahčadii movt Sámedikki doarjja sáhttá leat veahkkin álkidahttime barggu návetdoalus.
– Go galledin Andersena doalu, de muitalii son ahte loaktá hui bures ealáhusas ja ahte son atná árvvus doarjaga ja juohkinkultuvrra maid sii leat nagodan hukset guovllus, dadjá Erke.
