-Almmuhus-
OĐĐASATOarje-Finnmárkkus maid riedja

Oarje-Finnmárkkus maid riedja

-

-

Ii Oarje-Finnmárkkus ge lean unnit riedja našunálabeaivvi.

Oarje-Finnmárkku politiijain lei maid oalle bargu jaskkodahttit našunálabeaivvi ávvudeddjiid.

Finnmárkku politiijaguovllu oarjjabeale politiijat dattetge eai dieđit seamma olu soahpameahttunvuođaid leamaš doppe, go Nuorta-Finnmárkkus dien jándoris.

 

Feastariejat olles ija

Badjelaš gaskaija, miessemánu 17. beaivvi, šadde politiijat fitnat muhtin priváhtadálus Álttás gos lei feasta.

– Politiijat leat addán njálmmálaš dieđu «feastaeaiggádii» ahte dálus galgá leat jaskat gitta gávcci rádjai iđidii, čálle politiijat Twitteris.

 

Seamma áiggis ožžo Álttá politiijat dieđu ahte muhtin biillat galge leat biliduvvon. Politiijat fitne geahččamin daid.

– Čájehuvvui ahte biillat leat áigá biliduvvon. Eat dieđe geat dan leat dahkan, čálle politiijat maŋŋil.

 

Máŋga feastta oktanaga

Beal ovttas ihkku, ožžo politiijat fas dieđu ahte muhtin báikkis Álttás lei feasta gos ledje vuolleahkásaččat ja riedja. Politiijat fitne báikkis ja gohččo olbmuid jaskkodit.

Seamma áiggis bođii politiijaide diehtu maiddái muhtin eará feastta birra, gos maid lei riedja. Politiijat fitne báikkis ja loahpahedje dan.

 

Beal ovttas ožžo maiddái Hámmárfeastta politiijat dieđu ahte Hámmárfeasttas lei feasta muhtin sajis gos lei riedja. Doppe maid gohččo politiijat olbmuid jaskkodit.

 

Biilavuoddji váidui

Ovtta áigge ihkku bissehedje Álttá politiijat muhtin biilla, mas ledje glásat lobiheamet sevnnjodahtton. Vuoddji lei muhtin vuollel 20-jahkásaš gánda.

– Son váido dán ovddas, čállet politiijat.

 

Massii vuodjenkoartta

Leavnnjas, Porsáŋggus, ledje maid gárrenolbmot. Diibmu 01:15 dieđihedje politiijat iežaset váldán ovtta albmá gárrenoaivvis vuodjimin. Politiijat ásahedje ášši dás ja duoguštedje albmá vuodjenkoartta.

 

Gohččojuvvui guođđit báikki

Váile guovttis dieđihedje Álttá politiijat fas alddiineaset barggu. Dalle šadde gohččut muhtin njealjátlot-jahkásaš albmá guođđit muhtun olgobáikki Álttás. Almmái gohččojuvvui bissut eret báikkis reasta ija.

 

Loahpahedje feastta Hámmárfeasttas

Beal golmma áigge našunálabeaive ija dieđihedje Hámmárfeastta politiijat fas šaddan fitnat muhtin priváhta dálus.

Politiijat loahpahedje feastta.

 

Guččai politiijavistti njeaiga

Váile golmmas lei ges okta njealjátlot-jahkásaš almmái Hámmárfeasttas sáhttit gávdnat buoret guččadanbáikki. Dat oainnat váldui, go guččai Hámmárfeastta politiijakantuvrra seainni njeaiga, olgouvssa buohta.

– Son váido, čállet politiijat.

 

Váile guđas iđđedis šadde Álttá politiijat fas fitnat loahpaheamen muhtin feastta.

– «Feastaeaiggádii» lea dieđihuvvon ahte báikkis galgá leat jaskat.

 

Nuorra gánddat johtolatrieggás jugadeamen

Váile oktanuppelogis, ovdalgaskabeaivvi, ledje politiijat ges guokte nuorra gándda ságain Álttás. Albmáguovttos leigga muhtin johtolatrieggás čohkohallamin ja vuolaid jugadeamen, go politiijat áice sudno.

– Mii njoaraimet juhkamušaid eatnamii ja gohčuimet sudno guođđit báikki, čállet politiijat.

 

Doaruhan soapmása

Badjelaš gávccis iđđedis šadde politiijat ges fitnat muhtin priváhtadálus Álttás, gos muhtin lei fallehan soapmása.

– Fallehuvvon olmmoš viehkalii eret báikkis, ja politiijat fitne falleheaddji ságain.

 

 

 

 

 

-Almmuhus-