Ođđa logut, maid Justiisadepartemeanta lea almmuhan, čájehit ahte Norggas leat 157 olbmo geat vurdet saji gednemii.
Ođđa logut, maid Justiisadepartemeanta lea almmuhan, čájehit ahte Norggas leat 157 olbmo geat vurdet saji gednemii.
Ovddádusbellodat lohká ahte lea historjjálaš vuollegis lohku.
– Mis ii leat rievtti mielde šat vuordináigi giddagasaide. Lea njuolgut jávkan, lohká Ovddádusbellodaga Himanshu Gulati NTB:i.
Seamma logai bellodatjođiheaddji Siv Jensen diibmá, go ledje 328 olbmo vuordinlisttus. Juovlamánus diibmá ledje 242 olbmo vuordinlisttus.
Justiisaministtar Per-Willy Amundsen vástidii Gulati gažaldahkii ahte lohku rievddada. Ovdal geasi ledje 405 olbmo vuordinlisttus.
Rievddada
Maiddái go ruksesruoná ráđđehus lei, de rievddadii vuordinlistu. Ovdal go Stoltenberg-ráđđehus válddii badjelasas, ledje 2 579 olbmo vuordinlisttus giddagasaide. Golggotmánu 2009 ledje 250 olbmo vuordime. Go ráđđehus molsojuvvui 2013:s, de ledje 1 213 olbmo vuordime.
Vaikke rievddada, de oaivvilda Gulati ahte giddagassajit, maid ráđđehus láigoha Nederlánddas, leat ávkin vuordinlisttu oanideapmái.
Eambbo gednemat
Disdaga almmuhii Statistihkalaš guovddášdoaimmahat (SSB) 2015 gednenloguid. Bođii ovdan ahte eambbosat ledje gednemis go 2014:s.
2015 álggus ledje 4 056 olbmo Norgga giddagasain. Statistihkka čájeha geat leat giddagasain Norggas.
65 proseantta leat giddagasain gednemis. 5,5 proseantta leat gedneme giddagasduomu, elektrovnnalaš bearráigeahčus, 2 proseantta ledje rájusgiddagasas ja 1,5 proseantta ledje sáhkkogednemis.
Maŋemuš 26 proseantta ledje háldogiddagasas, go ledje duomu vuordime.
Vaikke 2014 álggus ledje 4 103 olbmo giddagasain Norggas, ja 2015 álggus fas 4 056 olbmo, de lea giddagasasgednen ja elektrovnnalaččatgednen lassanán 2015:s. (©NTB)
