-Almmuhus-
-Almmuhus-
-Almmuhus-
OĐĐASATOallugat váldet mátketelefovnna báldii go nohkket

Oallugat váldet mátketelefovnna báldii go nohkket

-

-

Eambbo go ovccis logi studeanttas ja oahppis ođđet mátketelefovnnain. Dan eai berreše.

Frende Forsikring iskosis boahtá ovdan ahte gávccis logi olbmos váldet mátketelefovnna oađđinlatnjii ihkku.

– Oallugat lohket ja sáddejit dieđuid ovdal go nohkket, dahje nohkket musihka guldalettiin. Earát bidjet fas diimmu telefovnnas riŋget iđđes, dadjá Frende buollinekspearta, Øystein Øren preassadieđáhusas.

 

Mátketelefovdna buollái seaŋggas

– Mátketelefovdna, Samsung S3, bávkkehii ja buollái, muitala Øren. Lihkus gullái eaiggát go bávkkehii, iige roasmmehuvvan, ja háhppehii bálkestit seaŋgagávnniid ja mátketelefovnna čáhcái. Oanehis áiggis lei mátketelefovdna boaldán čiekŋalit ráiggi bolstarii. 

Mátketelefovdna ii lean elrávnnjis ge, lei báhtter mii bávkkehii.

Dolla ii leavvan, ja vahága seaŋggas ja mátketelefovnnas gokčá dáhkádus.

– Mearkkašat go ahte mátketelefovdna báhkkana, dahje duohken bullá, de berret leat várrogas. De livččen iskkahan dan jođáneamos lágiin, dadjá Øystein Øren.

 

Gullát go jus mihkke geavvá?

Frende buollinekspearta oaivvilda ahte ii berre oađđit diekkáraš apparáhtaiguin vai ii dagat dárbbašmeahttun riskka.

– Mirkkolaš gásat apparáhtain leat liikká váralaččat go dolla. Jus oađát, de ii leat sihkar ahte mearkkašat ovdal go lea beare maŋŋit, dadjá son.

YouGov lea Frende Forsikring ovddas jearran norgalaččain váldet go mátketelefovnna mielde oađđenlatnji ihkku ja láddejit go dan, dahje láddejit go dan eará sajis ihkku.

 

Rávesolbmot leat ipmirdan dan

– Ahkeluohkás badjel 60 vástidit dušše 12 proseantta ahte de láddejit oađđenlanjas ihkku, vaikko 52 proseantta váldet dan mielde oađđenlatnjii. Leat dieđusge olu sivat manne mátketelefovdna lea oađđenlanjas ihkku, oallugiidda lea oadjebasvuohta, dadjá Øystein Øren.

Ahte guđas logi olbmos ahkeluohkás 18-29 láddejit ihkku, lea balddihahtti. Sus lea čielga ráva ahte ii láddet ihkku, jus ii dárbbat. 

– Mii lea realisttalaččat, mii diehtit ahte ferte láddet, muhto muitte ahte apparáhtat dárbbahit áimmu. Elektrihkalaš apparáhtat sáhttet jođánit liegganit jus leat seaŋggas dahje suffás, dadjá Øystein Øren.

– Galggašii láddet go ieš leat gozuid alde ja čuovut mielde. Telefovdna galggašii dakkár diŋgga alde mii ii sáhte buollát, ja gaikkit láddára eret go gearggat, dadjá son.

 

Olu viessobuollima

– Boasttugeavaheapmi ja heajos divodeapmi elektrihkalaš apparáhtain ja láddariin dagaha olu buollimiid, ja okta dain dábáleamos ákkaid buollimii, muitala son.

 

Ná dárkkistat ruovttu

Viessoeaiggádis lea ovddasvástádus buollinsihkarvuođas. Jus dássedit sihkkarasttát, de sáhtát unnidit buollinriskka. Dá lea maid iskkat:

 

Juohke beaivvi ovdal go nohkat:

  •  Dárkkis ahte gievkkanuvdna ja bivttasbassanmašiidna leat jáddaduvvon.
  • Jáddat TV jáddanboaluin.
  • Váldde dihtora, mátketelefovnna ja eará elektrihkalaš apparáhtaid eret láddaris idjii.
  • Iskka ahte ii ovttage ommana alde leat mihkke.

 

Juohke mánu:

  • Iskka suovvanjurggona suovain.

 

Juohke jagi:

  • Molsso suovvanjurggonis báhtteriid.
  • Geahča leat go čuovggain ja eará diŋggain buollinmearkkat.
-Almmuhus-