-Almmuhus-
-Almmuhus-
SMÁVVAOĐĐASATOallugat sihkkarastet ain mánáid boastut biila­mátkkis

Oallugat sihkkarastet ain mánáid boastut biila­mátkkis

-

-

Norgalaččat leat obbalaččat oalle čeahpit sihkkarastit mánáid biillas ovdal vulget luottaid ala vuojašit, muhto liikká leat ain máŋggas geat sáhkkohallet ja váidojuvvojit go eai leat rievttes ládje sihkkarastán iežaset ja mánáid.

– Ain leat muhtumat geat eai sihkkarastte mánáid rievttes láhkái ja dohkálaččat biillas, ja dat lea duođalaš ášši. Mánát leat min divrasepmosat ja lea vuoddji ovddasvástádus gozihit mánáid johtolagas, dadjá Stáhta geaidnodoaimmahaga johtolatsihkkarvuođa ossodatdirektevra Guro Ranes.

Stáhta geaidnodoaimmahaga ossodatdirektevra, Kjetil Wigedal, lohká muhtun olbmot vásedin garvet boahkániid geavaheames biillas.

– Dat lea áibbas ipmirmeahttun ja čájeha ahte min bearráigeahččamat ain leat dehálaččat, lohká Wigdel.

– Dahká erohusa eallimis ja jápmimis

Stáhta geaidnodoaimmahaga lihkohisvuođaanalysa čájeha ahte sullii okta olmmoš juohke goalmmát olbmos geat dušše biilalihkohisvuođas, eai geavahan biilaboahkána dahje geavahedje dan boastut.

Vaikko eatnasat geaid Stáhta geaidnodoaimmahat bisseha bearráigeahčus geavahit biilaboahkána, de oaivvilda Wigdel ahte 1037 sáhku maŋemus jahkebealis leat beare máŋga sáhku. Seammás lohká son ahte máŋggas geat vudjet biilaboahkána haga eai goassege bissehala.

Oaivesuodje- ja biilaboagángeavaheapmi unnida riskka jápmit ja garrasit roasmmehuvvat johtolagas. Biilaboagángeavaheapmi suddje sihke du iežat ja earáid jus lihkohisvuohta dáhpáhuvvá.

Jus bissehalat Stáhta geaidnodoaimmahaga bearráigehččiide johtolagas vuodjime biilaboahkána haga dahje oaivesuoji haga de lea sáhkku 1500 ruvnno.

– Vaikko eatnasat atnet biilaboahkána, de lea liikká váidalahtti ahte ain leat nu máŋggas geat eai daga dan. Earenoamážit go mii diehtit ahte dát sáhttá dahkat erohusa eallimis ja jápmimis jus lihkohisvuohta dáhpáhuvvá, dadjá Wigdel preassadieđáhusas. 

-Almmuhus-