13 sámi nuora háliidit šaddat ofelažžan.
Ohcanáigemearri ofelašdoibmii dievai mannan ija. Sámi Allaskuvla, mii jođiha doaimma, dieđiha ahte leat olles 13 nuora miehtá Sámi geat leat sádden ohcamuša šaddat sámi ofelažžan.
– Mii leat hui ilus ja maiddái veahá gealdagasas, lohká ofelašdoaimma bargi Risten Länsman preassadieđáhusas.
Luksus váttisvuohta
Sámi ofelaččat logaldallet sápmelaččaid birra vuosttažettiin joatkkaskuvllain miehtá Norgga, muhto galledit maiddái eará skuvllaid dego nuoraid- ja mánáidskuvllaid, oahpaheaddjistudeanttaid ja doppe gos lea dárbu gilvit eanet dieđuid sámiid birra. Sámi ofelašdoaibma álggahuvvui álggos geahččalanprošeaktan 2004:s, muhto golbma jagi maŋŋel mearridedje Norgga eiseválddit ásahit dán bistevaš doaibman. Sámi Allaskuvla jođiha ofelašdoaimma Gieldda- ja ođasmahttindepartemeantta ovddas. Álggu rájes leat ofelaččat lassánin golmmas njealji ofelažžii.
– Mii leat vásihan ahte lea alla dássi ohcciiguin ja jagis jahkái leat vásihan ovttalágan luksus váttisvuođa daningo mii eat sáhte válljet eanetgo njeallje nuora ofelašprográmmii. Mii ohcat sámi nuoraid miehtá Sámi ja maiddái earálágan kulturduogážiin, lohká Länsman.
Giitet iežaset ovddas
Sámi ofelaččat čađahit oahpu Sámi Allaskuvllas ovdal go johtigohtet, dáinna lágiin leat bures ráhkkanan logaldallat sápmelaččaid kultuvrra birra. Dán jagáš ofelaččat Anne Berit Pulk, Jon-Christer Mudenia, Sara Marja Utsi ja Yvonne Marie Miniggio gerget farga doaimmas. Ođđa ofelaččat almmuhuvvojit Márkomeanu festiválas bearjadaga suoidnemánu 24. beaivvi.
