Stáhta geaidnodoaimmahaga varas statistihkka čájeha ahte 14 proseantta buot diŋgojuvvon teoriijageahččalemiin šluhttejuvvojit go kandidáhtta ii boađe diibmui. Leat stuorra regionála erohusat.
Stáhta geaidnodoaimmahat čállá preassadieđáhusas ahte 14 proseantta eai boađe diŋgojuvvon diibmui, ja 35 proseantta sis geat váldet geahččaleami eai ceavzze. De šaddá vuordináigi vaikke Stáhta geaidnodoaimmahat lea fállan goasii 33 000 teoriijageahččaleami guovtti vuosttaš mánus dán jagi.
– Larvika, Plassje, Levoŋkka, Setesdala, Rjukana, Nordfjordeida, Fuoskku, Ålesunda ja Leavnnja johtolatstašuvnnain leat unnimusat 20 proseantta diŋgojuvvon diimmuin mat eai geavahuvvo, dadjá Stáhta geaidnodoaimmahaga ossodatdirektevra, Frode Børstad, preassadieđáhusas.
– Buoremus dán luohkás leat Girkonjárga, Tønsberg, Suorta, Kristiansund, Hamar, Sunndalsøra, Oppdal, Nåavmesjenjaelmie, Stïentje ja Áltá, gos leat dušše 5 proseantta mat eai boađe váldit geahččaleami.
Láikivuohta
Lea seamma álki cealkit eret diimmu go diŋgot diimmu. Kandidáhtat ordnejit visot geaidnodoaimmahaga neahttasiiddus. Teoriijageahččaleapmi ferte čađahuvvot johtolatstašuvnnas.
– Mii sáddet SMS-dieđuid ovdal geahččaleami. Nu ahte lea dušše láikivuohta mii dagaha ahte olbmot eai cealkke eret diimmu man eai áiggo čađahit. Dat lea heajos dahku earáid várás geat šaddet vuordit guhkit go lea dárbu, ja lea heajos dahku geavahit oktavuođagaskaomiid. Nu movt dál lea, de lea mis badjelmeare kapasitehta teoriijageahččalemiin, muitala Frode Børstad preassadieđáhusas.
Alla proseanta sis geat eai ceavzze
– Dássážii leat nationálalaččat 35 proseantta geat eai ceavzze teoriijageahččaleamis. Dat lea hui alla lohku, vaikke lea veahá njiedjan ovdalaččas. Mii jáhkkit ahte oallugat váldet geahččaleami vaikke eai leat hárjehallan olus ovdal, dadjá Børstad preassadieđáhusas.
